Х.Нямбаатар: Ирэх оны нийслэлийн төсвийн орлогын 85.9% буюу 3.3 их наяд төгрөгийг татвараар бүрдүүлнэ

Гэрэл зургийг mpa.mn

Нийслэлийн ИТХ-ын/НИТХ/ ээлжит бус II хуралдаан эхэллээ.

Өнөөдрийн хурлаар ирэх оны нийслэлийн төсвийг батлах, автотээврийн хэрэгслийн албан татварын хувь хэмжээ, авто зам ашигласны төлбөрийг шинэчлэн батлах, 2025 оны газар зохион байгуулалтын төлөвлөгөө, төвлөрсөн хогийн цэгт хог хаягдлыг дарж булшлах тарифыг шинэчлэх гээд эдийн засгийн асуудлыг хэлэлцэнэ.

Нийслэлийн ирэх оны төсвийн суурь орлогыг 3.226.4 тэрбум, суурь зарлагыг 3.226.4 тэрбум төгрөг байхаар тооцон нийслэлийн төсвөөс улсын төсөвт орлого төвлөрүүлэхгүй байхаар баталжээ. 

Хотын дарга Х.Нямбаатар "Нийслэлийн ирэх оны төсөвт гурван их наяд 856.3 тэрбум төгрөгийн орлого төвлөрүүлэхээр төлөвлөсөн. ААН-ийн орлогын албан татвар 200.9 тэрбум, хувь хүний орлогын албан татварыг 251.9 тэрбум, хөрөнгийн албан татварыг 107.7 тэрбум, татварын бус орлогыг 351.1 тэрбум төгрөгөөр тус тус нэмэгдэхээр байна.

Төсвийн төслийн тооцоогоор нийслэлийн төсвийн орлого 85.9% буюу 3.3 их наяд төгрөгийг татварын орлогоор, 14.1% буюу 541.9 тэрбум төгрөгийг татварын бус орлогоор төвлөрүүлэхээр байна.

Нийт зарлагын төсөлд 38.2% буюу 1.3 их наяд төгрөгийг урсгал зардалд, 48.9% буюу 1.7 их наяд төгрөгийг хөрөнгийн зардалд, 2.2% буюу 78.3 тэрбум төгрөгийг дамжуулан зээлийн эргэн төлөлтөд, 9.4% буюу 327.2 тэрбум төгрөгийг үнэт цаасны эргэн төлөлтөд, 0.4% буюу 14.1 тэрбум төгрөгийг алслагдсан гурван дүүргийн санхүүгийн дэмжлэгт олгохоор төлөвлөлөө.

Урсгал зардлын төсвийн төсөлд 827.1 тэрбум төгрөг буюу 61.9%-ийг хотын шуудын урсгал зардалд, 508.5 тэрбум төгрөг буюу 38.1%-ийг есөн дүүргийн урсгал зардал эзэлж байна.

Ирэх оны төсвийн хөрөнгөөр нийт 4.6 их наяд төгрөгийн хөрөнгө оруулалт хэрэгжүүлэхээр төлөвлөсөн бөгөөд үүнээс нийслэлийн төсвийн хөрөнгө оруулалтаар 1.5 их наяд, замын сангийн хөрөнгө оруулалтаар 153.2 тэрбум төгрөг, орон нутгийн хөгжлийн сангийн хөрөнгөөр 24.1 тэрбум төгрөг нийт 1.7 их наяд төгрөгийн шинэ 97 төсөл арга хэмжээ, шилжин хэрэгжих 68, 2024-2025 онд дамжин санхүүжих 2.9 их наяд төгрөгийн 263 төсөл арга хэмжээг тус тус санхүүжүүлэхээр тусгалаа" гэж танилцууллаа.

Төсвийн тухай хуульд, төсвийн төслийг боловсруулахдаа олон нийтэд танилцуулж, иргэдийн санал хүсэлтийг тусгана гэж заасны дагуу Ulaanbaatar.mn цахим хуудсанд байршуулан иргэдийн саналыг авахын зэрэгцээ есөн дүүргийн 400 гаруй иргэдийг хамруулсан нээлттэй хэлэлцүүлэг хийжээ. Мөн цахим санал асуулга явуулахад нийт 700 орчим саналыг ирүүлсэн байна.

Иргэд, сургууль орчмын аюулгүй байдлыг хангах, сургууль, цэцэрлэгийн хүртээмжийг нэмэгдүүлэх, урт цагааны гудамжийг ногоон байгууламж болгох, нийтийн тээврийн үйлчилгээний хүртээмжийг сайжруулах, үерийн хамгаалалтын барилга байгууламжийг өргөтгөх, ногоон байгууламж, гэрэлтүүлгийг нэмэх, явган болон дугуйн зам барих, авто замыг өргөтгөн шинэчлэх, орон сууцны дээврийн засвар, цахилгаан шатны засвар арчлалтыг хийх зэрэг саналыг ирүүлсэн байна. Улаанбаатар хотын захирагч Х.Нямбаатар “Нийслэлийн 2025 оны төсвөөс иргэдийн дээрх санал, хүсэлтийг шийдвэрлэнэ” гэв.

ШУУД ҮЗЭХ: