Тээврийн хэрэгслийн албан татвар болон авто зам ашигласны төлбөрийг нэмэх эсэхийг өнөөдөр шийдэх гэж байна

Гэрэл зургийг MPA агентлагийн онцгой зөвшөөрөлтэйгөөр ашиглав

Нийслэлийн ИТХ-ын/НИТХ/ ээлжит бус II хуралдаан өнөөдөр үргэлжилж, зургаан асуудлыг хэлэлцэхээр төлөвлөжээ.

Тодруулбал ирэх оны нийслэлийн төсвийг батлах, автотээврийн хэрэгслийн албан татварын хувь хэмжээ, авто зам ашигласны төлбөрийг шинэчлэн батлах, 2025 оны газар зохион байгуулалтын төлөвлөгөө, төвлөрсөн хогийн цэгт хог хаягдлыг дарж булшлах тарифыг шинэчлэх гээд эдийн засгийн асуудлыг хэлэлцэнэ.

Эдгээрээс онцлоход тээврийн хэрэгслийн татвар болон авто зам ашигласны төлбөрийг ирэх онд 3-4 дахин нэмэхээр тогтоолын төсөлд тусгасан нь нийслэлийн иргэдийг бухимдуулсан асуудал болоод буй. Тухайлбал авто замын түгжрэлийг бууруулах оновчтой шийдэлгүй мөртлөө тээврийн хэрэгслийн татвар, төлбөрийг нэмж иргэдийн нуруун дээр ачаа үүрүүлэх нь тохиромжгүй гэх шүүмжлэл ч гарч байна.

Энэхүү татвар, төлбөрийн хэмжээг яг хэд болгож нэмэхээр төлөвлөснийг өнөөдөр нийтэд албан ёсоор танилцуулж, НИТХ-ын 45 төлөөлөгч хэлэлцэж, шийднэ.

Улаанбаатар хотын агаарын бохирдлыг бүрдүүлэгч азотын давхар ислийн 28.2% нь гэр хорооллын, 63.2% нь  автомашинаас ялгарах утаа. Үүнээс үзвэл агаарын бохирдлын багагүй хувийг автомашинаас ялгарах утаа бүрдүүлдэг гэж нийслэлийн Засаг даргын орлогч танилцуулж байв.