• 11 сарын 30, Бямба
|
|
Уншиж байна ...

PUBGM: Манай улсын "4Merical Vibes" баг энэ оны дэлхийн аваргын "Grand Finals"-д оролцохоор болжээ

Н.Эрхбаяр, iKon.mn
12 минутын өмнө
iKon.MN
Зураг зураг
4Merical Vibes

Цахим спортын PUBG MOBILE тоглоомын дэлхийн аварга шалгаруулах тэмцээн (PMGC 2024)-ий хэсгийн шатны тоглолтууд өнгөрсөн долоо хоногт Малайз улсад зохион байгуулагдаж дууссан.

PUBG MOBILE тоглоомын дэлхийн аварга нь "Group Stage" болон "Grand Finals" гэсэн хоёр шатаас бүрддэг. "Group Stage"-д бүс бүсийн шилдэг нийт 48 баг өрсөлдсөн бөгөөд 15 баг нь Английн Лондон хотод зохиогдох "Grand Finals"-д оролцох эрх авсан.

"Group Stage"-д манай улсаас нийт дөрвөн баг өрсөлдсөн боловч зөвхөн "Falcons Force" баг "Last chance"-ийн нэгдүгээр байрт бичигдэж, "Grand Finals"-д оролцох эрх авсан. Энэ шатны 1-6 дугаар байрт бичигдсэн багууд Лондон хотыг зорих эрхтэй болсон юм.

Гэтэл "Last chance" шатны долдугаар байрт бичигдсэн манай улсын "4Merical Vibes" баг PMGC 2024 тэмцээний "Grand Finals"-д тоглохоор болсон тухай албаны эх сурвалж  мэдээллээ.

Учир нь "Last chance" шатны зургаадугаар байрт бичигдсэн Бахрейн улсын Brute Force баг ирэх сарын 6-8-нд Лондон хотыг зорих визээ хугацаандаа авч амжаагүй аж. Тиймээс долдугаар байрт бичигдсэн манай улсын "4Merical Vibes" баг тэдний өмнөөс "PMGC 2024" тэмцээний "Grand Finals"-д тоглохоор болжээ.

Ингэснээр энэ удаагийн дэлхийн аваргад манай улсаас "Falcons Force" болон "4Merical Vibes" гэсэн хоёр баг оролцохоор болж байна. 

Тус тэмцээний тоглолтууд арванхоёрдугаар сарын 6-8-нд Лондон хотод зохион байгуулагдана. Нийт 16 баг оролцож, 18 тоглолтын нийлбэр дүнгээр аваргаа тодруулна.