УБТЗ-ын ачаа тээврийн хэмжээ өнгөрсөн оны мөн үеэс 2.6 хувиар өсжээ

Монгол Улсын Зам, тээврийн сайд Б.Дэлгэрсайхан ОХУ-ын Москва хотноо зохион байгуулагдсан “Тээврийн долоо хоног” арга хэмжээнд оролцох үеэрээ “Оросын төмөр замууд” НХН-ийн захирал Олег Белозёровтой уулзлаа.

Талууд уулзалтын үеэр Монгол-Оросын хувь нийлүүлсэн нийгэмлэг “Улаанбаатар төмөр зам”-ын  өнөөгийн ажлын үр дүн, стратегийн хөгжил, хэтийн төлөвийн талаар ярилцав.

Энэ үеэр “Бидний хийсэн үнэлгээгээр УБТЗ маш өндөр мэргэжлийн түвшинд үйл ажиллагаа явуулж байгаа бөгөөд сүүлийн 10 жилийн хугацаанд ачаа тээврийн хэмжээ 1.5 дахин нэмэгдэж, 2023 онд 32.4 сая тоннд хүрч, түүхэн дээд амжилт тогтоосон байна. Энэ оны 10 сарын дараах байдлаар тээврийн хэмжээ өссөөр байгаа нь 2023 оны мөн үеэс 2.6 хувиар илүү байна. Энэ сард тус төмөр зам өдөрт 103.3 мянган тонн ачаа ачиж, мөн шинэ дээд амжилт тогтоосон” гэдгийг Олег Белозёров онцоллоо.

Түүний хэлснээр, энэ оны 1-10 дугаар сард Монголоор дамжин ОХУ, БНХАУ-ын хоорондох чингэлэг тээвэрлэлт мөн 8 хувиар буюу 336 мянган TEU хүртэл өсжээ.

Монгол-Орос-Хятадын эдийн засгийн коридорын хүрээнд УБТЗ-ыг цаашид хөгжүүлэх ажлыг үргэлжлүүлэхээр талууд тохиролцов.

Эх сурвалж: “УБТЗ” ХНН