Японы гадаад хэргийн сайд Умард Солонгосын цэргийн асуудлыг хэлэлцэхээр Киевт айлчлав

Япон улсын гадаад хэргийн сайд Такеши Иваяа өчигдөр буюу Бямба гарагт урьдчилан зарлалгүйгээр Украины нийслэл Киев хотод айлчилжээ.

Бямба гарагийн өглөө Польшийн нутгаас галт тэргээр хүрэлцэн ирсэн Иваяа сайд Украины гадаад хэргийн сайд Андрей Сибигатай уулзсаныхаа дараа “Шударга, урт удаан энх тайван тогтоох Украин улсын хүчин чармайлтыг хэрэгжүүлэхийн төлөө Япон улс хамтын ажиллагаагаа үргэлжлүүлэх болно” гэж мэдэгдсэн байна.

Хоёр сайд мөн Умард Солонгос цэргээ Оросын баруун хязгаарт илгээж, эзлэн түрэмгийлэлд шууд оролцох алхам хийж буйг зэмлэн буруушаасан юм.

Энэ үеэр хоёр улс батлан хамгаалах салбарт тагнуулын мэдээлэл харилцан солилцох гэрээ байгуулсныг зарлажээ.

Уг гэрээ нь Орос-Умард Солонгосын хамтын ажиллагаатай холбоотой тагнуулын мэдээллийг талууд харилцан солилцоход чиглэж байгаа бололтой.

 

АНУ, Өмнөд Солонгос, Украины тагнуулын албадын мэдээлж байгаагаар одоо Умард Солонгосын 12,000 орчим цэрэг Оросын нутагт ирээд байгаа гэдэг.

Өнгөрсөн долоо хоногт ОХУ-ын Курск мужийн нутагт Украины цэргүүд Умард Солонгосын цэргүүдтэй бага хэмжээний тулаанд орсон тухай Киевийн албаны эх сурвалжууд мэдээлж байв.

Иваяа өчигдөр бас Украины ерөнхийлөгч Володимир Зеленскийд бараалхахдаа Оросын эзлэн түрэмгийллийн эсрэг тэмцлийг нь Япон улс тууштай дэмжихийг батлан илэрхийлсэн байна.

 

Энэ оны нэгдүгээр сард Японы гадаад хэргийн өмнөх сайд Йоко Камикава бас Киевт айлчилж байсан юм.

Өнгөрсөн сард үүрэгт ажилдаа орсон Японы шинэ засгийн газрын гадаад хэргийн сайд анхны гадаад айлчлалаараа Украинд ирж байна. Тэрбээр Перу улсад зохион байгуулагдсан Ази, Номхон далайн бүс нутгийн эдийн засгийн чуулга уулзалтад оролцсоныхоо дараа шууд Украинд иржээ.

Японы өмнөх ерөнхий сайд Фүмио Кишида өнгөрсөн оны гуравдугаар сард Киевт айлчилж байсан юм.

Эх сурвалж: Reuters