Армени улс руу монгол иргэд 30 хоног визгүй зорчих эсэхийг талууд хэлэлцэж байна
Армены Засгийн газрын хуралдаанаар (2024/11/7) тус улс болон Монголын иргэд хоорондоо визгүй зорчих, аялах боломжтой эсэхийг хэлэлцжээ.
Энэ талаар Армены хэвлэл болох thearmenianreport.com сайтад гарсан мэдээллийг орчуулан хүргэж байна.
Өмнө нь хоёр улсын хооронд зөвхөн дипломат паспортоор иргэд ийм боломжтой байсан бол одоо энгийн паспортоор 30 хоног аялах боломж бүрдэх талаар мэдээлэлдээ дурджээ.
Тодруулбал хоёр улсын хооронд визийн хөнгөлөлт үзүүлэх анхны хэлэлцээ 2019 оны зургаадугаар сарын 2-ноос эхэлсэн. Эхлээд дипломат болон төрийн албан тушаалтнууд хоёр улсын хооронд зорчиход саадгүй болж байв.
Тэгвэл саяхнаас Монгол Улсын Засгийн газрын зүгээс энэ гэрээг өргөжүүлэн байнгын зорчигчдыг визгүй нэвтрүүлэх санал гаргасныг Армены тал хүлээж авчээ.
Энэ шийдвэр албан ёсоор баталгаажсан үеэс эхэлж хоёр орны иргэд 30 хоног тухайн улсад аялах, зугаалах, түр оршин суух эрхтэй болох юм. Ингэснээр хоёр улсын хамтын ажиллагаа, харилцааг шинэ шатанд гаргана гэж үзэж байна.
Аялал жуулчлалаас гадна бизнесийн харилцаа илүү өргөжих боломж бий. Тус хоёр улс хөдөө аж ахуй, технологи, сэргээгдэх эрчим хүчний салбарт хамтран ажилладаг билээ.
Гэхдээ 30 хоног визгүй зорчих эсэхийг хоёр талын Засгийн газрын хуралдаанаар орж, харилцан албан бичиг солилцсоны дараа хэлэлцсэнээр хүчин төгөлдөр болох юм.
Одоогоор хэлэлцээ үргэлжилж байгааг манай улсын Гадаад Харилцааны Яамнаас мэдээлж байгаа.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
25 СЭТГЭГДЭЛТЭЙ
|
