Умард Солонгос цэргээ Оросын нутагт илгээсэн асуудлыг АНУ, Хятад хоёр “нухацтай” хэлэлцэж байна

Умард Солонгос цэргээ Оросын нутагт илгээсэн асуудлаар АНУ, Хятад хоёр “нухацтай” яриа хэлэлцээ өрнүүлж байгааг Вашингтоны өндөр албан тушаалтан өчигдөр мэдээлжээ.

Тухайлбал хамгийн ойрын хоёр түншийнхээ “өдөөн хатгасан” үйлдлийг таслан зогсоохын тулд илүү ихийг хийхийг Бээжингийн эрх баригчдад уриалснаа төрийн нарийн бичгийн дарга Энтони Блинкен өчигдөр Өмнөд Солонгосын гадаад хэргийн сайдтай уулзсаныхаа дараа мэдэгдсэн байна.

“Тэд бидний санааг зовоож буй асуудлуудыг сайн мэдэж байгаа. Тиймээс энэхүү үйл ажиллагааг таслан зогсоохын тулд өөрийн нөлөөллийг үг болон үйлдлээрээ харуулна гэдэгт би найдаж байна” гэж тэр хэлжээ.

Блинкений хийсэн мэдэгдлээс өмнө Нью Йорк Таймс сонин төрийн нарийн бичгийн даргын орлогч Курт Кэмбэл тэргүүтэй албаныхан Вашингтон дахь Хятадын элчин сайдын өргөөнд Бээжингийн дипломатчидтай “олон цаг” ярилцсан тухал мэдээлсэн юм.

Энэхүү уулзалтын талаар Хятадын элчин сайд ямар нэг мэдээлэл өгөөгүй байна.

Өчигдөр Блинкен бас Умард Солонгосын 8,000 орчим цэрэг ОХУ-ын Курск мужийн нутагт ирээд их буу, дрон ашиглах арга техник, явган цэргийн байлдааны тактик заалгаж байгааг мэдээлсэн юм. Тэднийг ойрын өдрүүдэд фронтын шугамд илгээж болзошгүй гэнэ.

Хэрвээ Умард Солонгосын цэргүүд Украины эсрэг дайнд оролцож эхэлбэл тэднийг “хууль ёсны бай” гэж үзэхээ Блинкен анхааруулжээ.

Өнгөрсөн долоо хоногт Хятадын гадаад хэргийн яамны хэвлэлийн төлөөлөгчөөс Умард Солонгосын цэргүүд ОХУ-д очсон талаар асуухад “энэ талаар мэдээлэлгүй байна” гэж хариулсан юм.

“Хятадын эрх баригчид Умард Солонгос, Оросын хамтын ажиллагааг ил тод шүүмжилж чадахгүй байх. Харин АНУ-тай явуулж буй стратегийн өрсөлдөөн, харилцаа зэргээ бодоод далдуур, чимээгүй шахалт үзүүлж магадгүй юм” гэж Вашингтонд төвлөрдөг Шинэ Америкийн Аюулгүй Байдлын Төвийн судлаач Дуён Ким тайлбарлажээ.

Өмнөд Солонгосын батлан хамгаалахын сайд Ким Ён Хюн өчигдөр бас хоёр улсын цэргийн хамтын ажиллагаанд Бээжингийн эрх баригчид “оролцоно” гэдэгт итгэж байгаагаа мэдэгдсэн юм.

“Хятад улс нөхцөл байдлыг ажиглаж, хүлээж байгаа гэж би бодож байна. Хэрвээ асуудал улам дордвол Бээжин зуучлагч, эсвэл өөр үүрэгтэйгээр хөндлөнгөөс оролцож магадгүй” гэж тэр хэлжээ.

Түүнтэй уулзсан Пентагоны тэргүүн Ллойд Остин “хэрвээ Хятад улс үнэхээр энхийг эрхэмлэгч улс юм бол Украины хямралыг өргөжүүлэх асуудалд нухацтай хандах ёстой” гэж анхааруулжээ.

Энэ долоо хоногийн Даваа гарагт Бээжин хотод Хятадын гадаад хэргийн сайд Ван И, ОХУ-ын гадаад хэргийн дэд сайд Андрей Руденкотой уулзахдаа Украины асуудлыг хэлэлцсэн сурагтай байгаа.

Саяхан Казань хотод болсон БРИКС-ийн дээд чуулганы үеэр Хятад, Оросын төрийн тэргүүнүүд уулзахдаа хоёр орны харилцаа “гаднын нөлөөнд автахгүй”-г батлан илэрхийлсэн юм.

Эх сурвалж: South China Moring Post