Зайсангийн хуучин гүүрний хөдөлгөөнийг 11 дүгээр сарын 8-наас 12 дугаар сарын 1-нийг хүртэл хаахаар болжээ
2024 оны 11 дүгээр сарын 8-ны өдрөөс 12 дугаар сарын 1-ний өдөр хүртэл Туул гол дээгүүрх Зайсангийн хуучин буюу зүүн талын гүүрний хөдөлгөөнийг хааж, Зайсангийн иргэдийн хэрэглэж байгаа бохир усны шугамыг шинэ татсан шугамтай холбох ажлыг гүйцэтгэхээр болжээ.
Өмнө нь 2024 оны 11 дүгээр сарын 1-нээс Зайсангийн хуучин гүүрний хөдөлгөөнийг хааж, буулгана гэж мэдээлж байсан юм.
Нийслэлийн Замын Хөгжлийн Газрын гүүрний хяналтын мэргэжилтэн Б.Жаргалдүүрэн "2022 оноос Зайсангийн гүүрийг шинэчилж, хос болгох ажил эхэлсэн. Энэ хүрээнд баруун талын шинэ гүүрийг барьж, хөдөлгөөнийг нээснийг та бүхэн мэднэ.
Харин зүүн талын хуучин гүүрийг 2025 онд буулгаж, шинээр барихаар төлөвлөөд байна. Үүнээс өмнө 2024 оны 11 дүгээр сарын 8-наас 12 дугаар сарын 1-нийг хүртэл хуучин гүүрний хөдөлгөөнийг хааж, Зайсангийн иргэдийн бохир усны шугамыг шинэ шугамтай холбоно. Өөрөөр хэлбэл гүүрний хөдөлгөөнийг 12 дугаар сарын 1-нд нээх юм.
Оргил ачаалал багассаны дараа буюу 2025 оны нэгдүгээр сард Зайсангийн хуучин гүүрний хөдөлгөөнийг дахин бүрмөсөн хааж, буулгахаар бэлтгэл ажлаа хангаж байна" гэж мэдээллээ.
Зайсангийн хуучин гүүр нь 1968 онд ашиглалтад орсон бөгөөд D үнэлгээнээс доошоо орсон буюу гүүрийг зайлшгүй буулгаж, дахин барих шаардлагатай болжээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
11 СЭТГЭГДЭЛТЭЙ
|
