Оросын эзлэн түрэмгийлэх дайнд тусалсан шалтгаанаар гадаадын 400 орчим компани, хувь хүн АНУ-ын хар жагсаалтад оров

Өчигдөр буюу Лхагва гарагт АНУ-ын засаг захиргаа Оросын эзлэн түрэмгийлэх дайны үйл ажиллагаанд технологийн дэмжлэг үзүүлсэн шалтгаанаар 400 орчим хувь хүн, байгууллагыг хориг арга хэмжээгээр шийтгэжээ.

Тус улсын сангийн яам эхлээд Энэтхэг, Хятад, Швейцар, Турк зэрэг улсын 275 иргэн, аж ахуйн нэгжийг “хар жагсаалт”-даа оруулж буйг зарласан юм.

“АНУ болон манай холбоотнууд Орос улсын Украины эсрэг явуулж буй хууль бус, ёс суртахуунгүй дайнд шаардлагатай багаж хэрэгсэл, технологи нийлүүлэх урсгалыг таслан зогсоохын тулд дэлхий даяар шийдвэртэй арга хэмжээг авсаар байх болно. Өнөөдрийн арга хэмжээгээрээ бид Оросын дайны машины тоноглох чадварыг доройтуулж, манай хориг арга хэмжээ, экспортын хяналтыг тойрон гарах, зайлсхийх арга зам хайж буй этгээдүүдийг зогсоох нөлөөтэй шийдвэрийг гаргаж байна” гэж АНУ-ын сангийн дэд сайд Уолли Адейемо мэдэгджээ.

Үүний дараа АНУ-ын төрийн департамент уг хоригийн цар хүрээг өргөжүүлсэн шийдвэрээ зарласан юм.

“Бид холбоотнууд, түншүүдийнхээ хамт авч хэрэгжүүлээд байгаа өргөн хүрээтэй хориг арга хэмжээн дээрээ нэмээд өнөөдөр Украины эсрэг Оросын явуулж буй хууль бус дайныг дэмждэг 400 орчим хувь хүн, байгууллагыг шийтгэж байна”  гэж төрийн нарийн бичгийн дарга Энтони Блинкен мэдэгджээ.

Тэрбээр цааш нь хэлэхдээ “Төрийн Департамент нь хэд хэдэн гуравдагч улс орны хуулийн этгээдүүд болон ОХУ-ын батлан хамгаалах яамны өндөр албан тушаалтнууд, батлан хамгаалах салбарын компаниуд, Оросын ирээдүйн эрчим хүчний үйлдвэрлэл, экспортын салбарыг дэмжин ажиллагсдыг хориг арга хэмжээгээр шийтгэж байна” гэж мэдэгдсэн юм.

Үүний дараа АНУ-ын худалдааны яам гадаадын 40 хуулийн этгээдийн эсрэг худалдааны хориг арга хэмжээг зарлажээ.

Тус яам АНУ-ын микроэлектроник болон бусад өндөр технологийн бараа бүтээгдэхүүнүүдийг Оросын талд нийлүүлдэг Хятад, Их Британи, Арабын Нэгдсэн Эмират зэрэг улсуудын өөр 49 компанийн өмнө нь тавьсан хоригийг нэмж чангаруулах арга хэмжээг авсан байна.

“Америкийн бүтээгдэхүүнүүд нь Оросын батлан хамгаалах аж үйлдвэрийн баазыг дэмждэг хүмүүсийн гарт орох ёсгүй” гэж худалдааны яамны аж үйлдвэр, аюулгүй байдлын асуудал эрхэлсэн дэд сайд Алан Эстевез мэдэгдэлдээ дурджээ.

Эх сурвалж: AFP