Урсгал данс энэ оны эхний найман сарын урьдчилсан гүйцэтгэлээр 832 сая ам.долларын алдагдалтай гарав

гэрэл зургийг MPA.mn

Монгол Улсын нийгэм, эдийн засгийн 2024 оны эхний найман сарын үзүүлэлтүүдийг Үндэсний Статистикийн Хороо(ҮСХ)-ноос өнөөдөр танилцууллаа. 

Төлбөрийн тэнцэл 2024 оны эхний найман сарын урьдчилсан гүйцэтгэлээр 186.7 сая ам.долларын алдагдалтай гарчээ. 

Мөн урсгал данс 2023 оны эхний найман сард 295.7 сая ам.долларын ашигтай байсан бол энэ оны эхний найман сард 832 сая ам.долларын алдагдалтай гарав. Урсгал данс алдагдалтай гарахад 

• барааны худалдааны ашиг 2.3 тэрбум ам.доллар болж, өмнөх оны мөн үеэс 779.3 сая ам.доллароор буурсан
• үйлчилгээний алдагдал 63.8 сая ам.доллароор өссөн
• анхдагч орлогын дансны алдагдал 362.7 сая ам.доллароор өссөн зэрэг нь голлон нөлөөлжээ.

Харин санхүүгийн данс энэ оны эхний найман сарын урьдчилсан гүйцэтгэлээр 932.4 сая ам.долларын ашигтай байлаа. Ингэхэд

•  гадаадын шууд хөрөнгө оруулалтын дансны ашиг өмнөх оны мөн үеэс 562 сая.доллар буюу 46 хувь өссөн
• багцын хөрөнгө оруулалтын дансны ашиг 587.3 сая ам.доллароор нэмэгдсэн зэрэг нь гол нөлөөг үзүүлсэн байна.