Х.Нямбаатар: 2024-2028 онд их бүтээн байгуулалт, хөгжлийн тэсрэлтийг хийх болно
Нийслэлийн МАН-аас сонгуулийн үр дүнтэй холбоотой мэдээлэл хийлээ.
Энэ удаагийн орон нутгийн сонгуулийн урьдчилсан дүнгээр нийт 21 аймгийн 14 аймагт нь МАН-аас нэр дэвшигчид ялалт байгуулаад байна.
Тухайлбал, Архангай, Баянхонгор, Өвөрхангай, Завхан, Увс, Булган, Хөвсгөл, Орхон, Дархан-Уул, Сэлэнгэ, Дорнод, Говьсүмбэр, Дорноговь, Дундговь аймгуудад одоогоор МАН ялалт байгуулж олонхын суудлыг аваад байгаа аж. Мөн нийслэлийн есөн дүүргээс найман дүүрэгт МАН ялж нийслэлийн иргэдийн төлөөлөгчдийн хурлын 45 мандатаас 40 суудлыг аваад байна.
Сонгинохайрхан дүүргийн зургаадугаар тойрогт ялалт байгуулаад буй Х.Нямбаатар "Нийслэлийн МАН-аас энэ удаагийн сонгуульд есөн эмэгтэйг нэр дэвшүүлснээс бүгд ялалт байгуулаад байна. 2024-2028 онд нийслэлийн МАН-аас дэвшүүлсэн мөрийн хөтөлбөрийг бид хэрэгжүүлж нийслэл хотынхоо тулгамдсан олон асуудлуудыг шийдэн их бүтээн байгуулалт, хөгжлийн тэсрэлтийг хийх болно.
Бидэнд итгэл үзүүлсэн сонгогчдодоо талархлаа. Мөн бидэнд санал өгөөгүй ч нийслэл хотынхоо төлөө санаа зовниж байгаа нийт сонгогчдынхоо итгэлийг олж авахын төлөө хичээн зүтгэж ажиллах болно" гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
