Орон нутгийн сонгуульд хэрхэн санал өгөх вэ?

Гэрэл зургийг MPA агентлагийн онцгой зөвшөөрөлтэйгөөр ашиглав

 Аймаг, нийслэл, сум, дүүргийн иргэдийн төлөөлөгчийн хурлын 2024 оны ээлжит сонгуулийн санал авах өдөр маргааш буюу аравдугаар сарын 11-нд. 

Сонгуулийн санал хураалтын талаар мэдээлэл хомс, орон нутгийн сонгуульд анх удаа санал өгч байгаа иргэдэд зориулан дараах мэдээллийг хүргэж байна. 

Сонгуулийн санал хураалт 2024 оны аравдугаар сарын 11-ны Баасан гарагийн 07:00-20:00 цагийн хооронд зохион байгуулагдана. 

Энэ хугацаанд хаана очиж санал өгөхөө мэдэхгүй бол ЭНД дарж санал авах байрны хаяг байршлыг мэдэх боломжтой. 

Орон нутгийн сонгуулийн саналын хуудас нь хоёр хэсэгтэй бөгөөд дээд талд нь тухайн аймаг, нийслэлд нэр дэвшигчдийн нэрс, доод хэсэгт нь сум, дүүрэгт нэр дэвшигчдийн нэрс байна. Өөрөөр хэлбэл, нэг саналын хуудсаар хоёр шатны иргэдийн төлөөлөгчийг сонгоно. 

Мөн орон нутгийн сонгуулийн санал хураалтын нэг онцлог нь сонгогч мандатын тооноос илүүгүй нэр дэвшигчийг дугуйлж болно. УИХ-ын сонгуульд нэр дэвшигчдийг мандатын тоотой тэнцүү тоогоор дугуйлж байж саналын хуудас хүчинтэйд тооцогдож байсан. Харин орон нутгийн сонгуулийн хувьд мандатын тооноос илүүгүй буюу цөөн хүн дугуйлж болох онцлогтой юм. 

 

Аймаг, нийслэл, сум, дүүргийн иргэдийн төлөөлөгчийн хурлын 2024 оны ээлжит сонгуулийн санал авах өдрийг бүх нийтийн амралтын өдөр байхаар хуульчилсан. Гэвч энэ өдөр ажиллах хувийн хэвшлийн байгууллага олон бий. Тэгвэл орон нутгийн хурлын сонгуулийн тухай хуулиар санал авах өдөр ажиллаж байгаа сонгогчид тухайн байгууллагын удирдлага чөлөө олгож, саналаа өгөх боломжоор хангах ёстой. Хэрэв чөлөө өгч саналаа өгөх боломжоор хангаагүй бол тухайн ажил олгогчид Зөрчлийн тухай хуулийн дагуу торгох хүртэл арга хэмжээ авдаг. Түүнчлэн санал авах өдөр олон нийтийг хамарсан урлаг соёлын арга хэмжээ зохион байгуулах, зах, худалдааны төвүүд ажиллахыг хориглодог.

Аймаг, нийслэл, сум, дүүргийн иргэдийн төлөөлөгчийн хурлын 2024 оны ээлжит сонгуулийн сурталчилгааны хугацаа аравдугаар сарын 9-ний 00:00 цагт дуусгавар болсон. Сурталчилгааны хугацаанд тухайн тойрогт нэр дэвшигчдээ судалж, танилцаж амжаагүй сонгогч iKon-mn сайтын "ИТХ 2024" хуудаснаас мэдээлэл авах боломжтой юм. 

"ИТХ 2024" хуудаснаас орон нутгийн сонгуульд оролцож буй 12 нам, эвсэл, тэдгээрээс аймаг нийслэлд нэр дэвшиж байгаа 1,992, сум, дүүрэгт өрсөлдөж буй 15,283 нэр дэвшигчийн мэдээллийг тойрог тус бүрээр харж болно. Үүнээс аймаг, дүүрэг, сум нь хэдэн тойрогт яаж хуваагдсаныг, тухайн тойрог нь хэдэн мандаттайг /хэдэн хүн нэр дэвшиж байгааг/ харж, сонголтоо хийх боломжтой юм.