Монголын их, дээд сургуулиудаас МУИС анх удаа олон улсад эрэмбээ тогтоолголоо

Гэрэл зургийг MPA агентлагийн онцгой зөвшөөрөлтэйгөөр ашиглав

Монгол Улсын Их Сургууль(МУИС) олон улсын их, дээд сургуулиудын чансааг тогтоодог Times Higher Education(THE) байгууллагаар эрэмбэлүүлж, (1,501+)-д жагсжээ.

Энэ нь Монголын их, дээд сургуулиудаас анх удаа олон улсад эрэмбэлэгдэж буй тохиолдол болж байна. 

МУИС-ийн ректор, профессор Б.Очирхуяг "Манай сургуулийн үйл ажиллагааны үндсэн зорилгын нэг нь Монгол Улсын дээд боловсролын түвшинг олон улсад үнэлүүлэх юм. THE нь жил бүр эрэмбийн үндсэн шалгуур үзүүлэлтүүдээ тогтоож, олон улсад байгаа их, дээд сургуулиудын эрэмбэлдэг. МУИС энэ эрэмбийн шалгуурыг биелүүлэхийн төлөө сүүлийн жилүүдэд амжилттай ажилласан. Бид жилд дунджаар 200 гаруй өгүүлэл хэвлүүлж байж олон улсад эрэмбэлүүлэх эрхээ авсан.

Эрэмбийг тогтоолгоход ихээхэн зүтгэл гаргасан МУИС-ийн багш, судлаачдадаа талархал илэрхийлье" гэв.

Боловсролын Яамны Дээд боловсролын газрын дарга Б.Ариунболд "МУИС анх удаа олон улсад эрэмбээ тогтоолгож байгаа нь Монголын дээд боловсролын салбарт томоохон үр дүн авчирна. Тухайлбал дараа дараагийн их, дээд сургуулиудыг олон улсад эрэмбээ тогтоолгоход сайн талтай. Мөн дэлхийн их, дээд сургуулиудтай ахисан түвшний сургалтын сургалт хамтарч явуулах, мэдлэг туршлагаа хуваалцах, олон улсын эрдэм шинжилгээний сэтгүүлүүдэд хамтарсан өгүүлэл гаргах зэрэг давуу талыг Монголын дээд боловсролын салбарт авчирч байна" гэв.