МОНАДА: Б.Баттөгсөөс допинг илэрснийг мэдэгдсэн боловч Паралимпт барилдуулахаар авч явсан
Паралимпын наадам өнгөрсөн долоо хоногт хаалтаа хийсэн билээ. Тус наадмын пара жүдогийн төрөлд манай улсаас дөрвөн тамирчин өрсөлдсөн юм.
Гэвч эрэгтэйчүүдийн 90 кг-ын жинд Б.Баттөгс барилдах байсан боловч дэвжээнд гараагүй. Паралимпын наадамд оролцохоор явсан тамирчин яагаад барилдаагүй талаар мэдээллийг Монголын Үндэсний Допингийн Эсрэг Агентлаг (МОНАДА)-аас өглөө.
МОНАДА-ийн мэдээлж буйгаар "Паралимпын хорооноос хоёр тамирчныг цагаан хуудсаар оруулах болсон, яаралтай шинжилгээ авах тухай даалгаврыг манай байгууллагад долдугаар сард ирсэн.
Ийнхүү пара жүдо бөхийн эрэгтэйчүүдийн 90 кг-ын жинд Б.Баттөгс цагаан хуудсаар орохоор болж, допингийн шинжилгээг долдугаар сарын 29-нд яаралтай горимоор авсан.
Наймдугаар сарын 20-нд шинжилгээний хариу ирж, тамирчны сорьцоос допингийн төрлийн бодис илэрсэн. Тиймээс Б.Баттөгсийг хоёр дасгалжуулагчтай нь наймдугаар сарын 30-нд дуудаж уулзсан байгаа.
Энэ үеэр түүнд тамирчны эрхийг нь хязгаарласан, долдугаар сарын 20-оос хойш орсон бүх тэмцээн хүчингүй болохыг сануулж, гарын үсэг зуруулсан. Мөн пара жүдогийн холбоонд тухайн тамирчнаас зөрчил илэрсэн тухай мэдээллийг наймдугаар сарын 30-нд өгсөн юм.
Үүнийг манай байгууллага есдүгээр сарын 3-нд Биеийн тамир, спортын улсын хороо, Паралимпын хороо руу зөрчил илэрсэн талаар мэдэгдсэн. Паралимпын багийн ахлагч Н.Оюунбат тус мэдээллийг авснаас хойш 48 цагийн дотор Б.Баттөгсийг тамирчдын тосгоноос гаргажээ.
Паралимпын хороо Парист ажиллаж байсан учраас Пара жүдогийн холбоо хороондоо мэдэгдэхгүйгээр тухайн тамирчныг авч явсан байна.
Хэрэв допингийн зөрчилтэй тамирчин Паралимпт барилдсан нь илчлэгдвэл манай улс олон улсын гэрээнд заасан үүргээр хариуцлага хүлээх магадлалтай байлаа" гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
