О.Баттулга: Үндэсний шигшээ багийг бүрдүүлэхэд 2024 онд ₮25.7 тэрбумыг улсын төсвөөс зарцуулсан
УИХ-ын Боловсрол, соёл, шинжлэх ухаан, спортын байнгын хорооны өнөөдрийн хурлаар 2023 оны улсын төсвийн гүйцэтгэлийг хэлэлцэж байна.
Энэ үеэр Биеийн тамир, спортын улсын хорооны дарга О.Баттулга үндэсний шигшээ баг бүрдүүлэх үйл ажиллагааны төсвийн талаар мэдээлэл өглөө.
Тэрбээр "Үндэсний шигшээ баг бүрдүүлэх үйл ажиллагаанд зориулж 2024 онд 25.7 тэрбум төгрөгийг улсын төсвөөс зарцуулсан. Үүнд 26 спортын төрөл хамаарагдаж байгаа.
2017 оны хуулиар шигшээ багийг бүрдүүлэн зохион байгуулж, бэлтгэл сургуулилалтыг хангах үүрийг холбоо, төрийн бус байгууллагаар гүйцэтгүүлэхээр тусгасан.
Олимпод оролцсон амжилтын талаар спортын холбоодыг тайлангаа ирүүлэхийг шаардсан. Тайлан ирсний дараа дүгнэлт гаргаж, олимпод бэлтгэх үндэсний хороонд танилцуулж, ямар хариуцлагын шийдвэр гаргахыг ярилцана.
2024 онд спортын холбоодод зарцуулсан төсвийн задаргааны хувьд тэмцээн уралдаанд 12.5 тэрбум, баг тамирчдын цалинд 5.6, гадаад дотоодын бэлтгэлд 4.2 тэрбум төгрөгийг гаргасан.
Гол нь шигшээ багийн бүрэлдэхүүнд буй багш дасгалжуулагчид цаашдаа бэлтгэл сургуулилалтыг хэрхэн авч явах вэ гэдэгт нарийн төлөвлөгөө судалгаа гаргана.
Олимпод гаргасан амжилтын талаар төрийн бус байгууллагад хэлэлцүүлэг явж байгаа. Паралимп дууссаны дараа нэгдсэн дүгнэлт гаргаж, алдаагаа хэрхэн засахаа ярилцах болно" хэмээн ярилаа.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
9 СЭТГЭГДЭЛТЭЙ
|
