"Хичээлийн шинэ жил эхэлж байгаатай холбогдуулан тээврийн хэрэгслүүдийг тэгш, сондгой дугаараар хязгаарлахгүй"
2024-2025 оны хичээлийн шинэ жил эхэлж буйтай холбогдуулан тээврийн хэрэгслүүдийг улсын дугаарын тэгш, сондгойгоор зорчуулах хязгаарлалт хийхгүйг албаны эх сурвалж мэдээлэв.
Өнгөрсөн жилийн есдүгээр сард уг хязгаарлалтыг 14 хоног мөрдөж байв.
Энэ жилийн тухайд замын хөдөлгөөний түгжрэл, ачааллыг бууруулах зорилгоор богино хугацаанд хийж хэрэгжүүлэх ажлын төлөвлөгөө батлах тухай Хотын даргын захирамжид хичээлийн цаг эхлэх болон тарах үед гол гудамж замд нөлөөлөл үзүүлдэг сургуулиудын хичээл эхлэх цагийг зөрүүлэхийг Нийслэлийн Боловсролын газарт даалгажээ.
Захирамжид тээврийн хэрэгслүүдийг улсын дугаарын тэгш, сондгойгоор зорчуулах хязгаарлалт хийх талаар иргэдээс санал авах тухай тусгасан байсныг хассан байна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
