Г.Отгонтамир: Татвар, төлбөрөө төлөөгүй, үзлэг оношилгоонд ороогүй тээврийн хэрэгслийг замын хөдөлгөөнд оролцуулахгүй

Гэрэл зургийг MPA агентлагийн онцгой зөвшөөрөлтэйгөөр ашиглав

Улаанбаатар хотод бүртгэлтэй 752,483 тээврийн хэрэгсэл байгаагаас техникийн үзлэг оношилгоонд ороогүй 129,929 тээврийн хэрэгсэл, үзлэгт орж тэнцээгүй 31,171 тээврийн хэрэгсэл байна. Монгол Улсын замын хөдөлгөөний дүрэмд заасны дагуу тогтоосон хугацаанд техникийн хяналтын үзлэгт ороогүй, тэнцээгүй тээврийн хэрэгслийг замын хөдөлгөөнд оролцуулдаггүй. 

Энэ талаар Тээврийн Цагдаагийн Албаны/ТЦА/ Урьдчилсан сэргийлэх хэлтсийн ахлах мэргэжилтэн, цагдаагийн хошууч Г.Отгонтамир “Техникийн үзлэг, оношилгоонд ороогүй, тэнцээгүй тээврийн хэрэгсэл Улаанбаатар хотын замын хөдөлгөөнд оролцож байх үедээ эвдэрч, гэмтэн замын хөдөлгөөнд саад учруулдаг.

Өдөрт гурваас таван тээврийн хэрэгсэл замын хөдөлгөөнд оролцож байх үедээ эвдэрч гэмтсэний улмаас зохиомол түгжрэлийг үүсгэдэг. Тиймээс үзлэг оношилгоонд ороогүй, тэнцээгүй, техникийн бүрэн бүтэн байдлыг хангаагүй тээврийн хэрэгслийг замын хөдөлгөөнд оролцуулахгүй байх тал дээр үе шаттай арга хэмжээг авч ажиллаж байна” гэв.

Техникийн хяналтад ороогүй тээврийн хэрэгсэл замын хөдөлгөөнд оролцсон тохиолдолд авто тээврийн тухай хуулийн дагуу хүнийг 20 нэгж, хуулийн этгээдийг 200 нэгжтэй тэнцэх хэмжээний төгрөгөөр торгохоос гадна замын хөдөлгөөний аюулгүй байдлын тухай хуулийг зөрчсөн гэж үзэж хүний 50 нэгж, хуулийн этгээдийг 500 нэгжтэй тэнцэх хэмжээний төгрөгөөр торгох эрх зүйн зохицуулалттай байна.