ГССҮТ: Зам тээврийн осолд дүн шинжилгээ хийх, статистик боловсруулах зэрэг тохиргоотой программ хангамжтай болно
Зам тээврийн ослын бүртгэл мэдээллийн платформ боловсруулах, суурилуулах зөвлөх үйлчилгээний багтай уулзалт хийсэн талаар Гэмтэл Согог Судлалын Үндэсний Төвөөс мэдээллээ.
Нийслэлийн Засаг даргын тамгын газраас Дэлхийн банкны санхүүжилтээр хэрэгжүүлж буй "Улаанбаатар хотын тогтвортой авто зам, тээвэр төсөл"-ийн хүрээнд "Зам тээврийн ослын бүртгэл мэдээллийн платформ боловсруулах, суурилуулах зөвлөх үйлчилгээг"-г БНЭУ-ын "TRL Technologies India Private Limited" болон Их Британи улсын "TRL Limited United Kingdom" компанийн түншлэл гүйцэтгэхээр болсон аж.
Зөвлөх үйлчилгээний зорилго нь зам тээврийн ослыг орон зайн мэдээллийн санд бүртгэх, дүн шинжилгээ хийх, тайлан, статистик боловсруулах зэрэг тохиргоотой программ хангамж болон хөдөлгөөнт төхөөрөмжийн аппликэйшн хөгжүүлж нэвтрүүлэхэд чиглэж байгаа юм байна.
Энэхүү төслийн хүрээнд тус зөвлөх багийн ахлагч Tony Mathew болон холбогдох албаны мэргэжилтнүүд Гэмтэл согог судлалын үндэсний төвийн Статистик, тандалт судалгааны албаны мэргэжилтнүүдтэй уулзалт хийжээ.
Энэ үеэр Монгол Улсын зам тээврийн ослын өвчлөл, нас баралтын бүртгэл мэдээллийн сан бүрдүүлж буй байдал, дүн шинжилгээ хийх, тайлан мэдээлэл боловсруулах үйл ажиллагаатай танилцаж, цаашдын хамтын үйл ажиллагааны талаар ярилцсан байна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
