Т.Доржханд: Төрийн өмчийн компани нууцлаад 18 их наяд төгрөгийн нүүрсний оффтэйк гэрээг байгуулсан байдаг

Гэрэл зургийг MPA агентлагийн онцгой зөвшөөрөлтэйгөөр ашиглав

Төрийн худалдан авах ажиллагааны талаар Шадар сайд Т.Доржханд байр сууриа илэрхийлэв.

Тэрбээр "Шадар сайд Доржханд буюу ХҮН нам төрийн худалдан авах ажиллагааг бүхэлд нь хариуцаж байгаа гэж иргэд, УИХ-ын гишүүд буруу ойлгоод байна. Худалдан авах ажиллагааны бодлого, хяналтыг Сангийн яам хариуцдаг.

Шадар сайдын эрхлэх асуудлын хүрээнд Төрийн нэгдсэн худалдан авалтын агентлаг бий. Уг агентлаг хэрэгжүүлэгч байгууллага бөгөөд нийт худалдан авалтын 29%-ийг хийдэг, үүнд концессын гэрээ хамаарахгүй.

Төр, хувийн хэвшлийн түншлэлийн тухай хуулиар тусдаа байгууллага концессын асуудлыг хариуцах юм билээ.

ХҮН нам бүх худалдан авалтыг хариуцдаггүй. Худалдан авах ажиллагааг олон улсын зарчмын дагуу бүх ил тод, нээлттэй байлгах ёстой.

Тухайлбал нууцлаад байгуулдаг ногоон автобусны асуудал байна. 40 их наядын нүүрсний хулгайн асуудлаар шүгэл үлээж, нээлттэй сонсголыг зохион байгуулж байсан хүний хувьд хэлэхэд нэг төрийн өмчийн компани нууцлаад 18 их наяд төгрөгийн оффтэйк гэрээг байгуулсан байдаг. Энэ байдлыг халж, төрийн өмчийн компаниудын худалдан авалтыг нэгдсэн агентлаг хариуцахаар хуульд өөрчлөлт оруулж байгаа.

Томоохон бүтээн байгуулалтын ажлуудыг хийхийн тулд хуульд өөрчлөлт оруулж буй. Хаврын чуулганаар хэлэлцэнэ. Зарим хуульчийн хардаад байгаа шиг зүйл байхгүй.

Худалдан авалт хүнээс хамаарахгүйгээр цахимжсан, шударга нээлттэй, ил тод байх ёстой гэсэн байр суурьтай хэвээр" гэж ярилаа.