"Оюу толгой" ХХК энэ улиралд дотоодын ханган нийлүүлэгчдээс ₮1.3 их наядын худалдан авалт хийжээ

Гэрэл зургийг MPA агентлагийн онцгой зөвшөөрөлтэйгөөр ашиглав

"Оюу толгой" ХХК-ийн Санхүү, бизнесийн газрын татварын нягтлан бодогч н.Дорж компанийн Монгол улсад оруулж буй хөрөнгө оруулалт, хамтын ажиллагааны хүрээнд хийгдсэн ажлын 2024 оны II улирлын мөнгөн зарцуулалтын мэдээллийг хүргэлээ. 

"Оюу толгой" ХХК энэ оны II улиралд Монгол улсад нийтдээ 1.6 их наяд төгрөгийн зарцуулалт хийсэн байна. Сар бүрийн нийт мөнгөн зарцуулалт голчлон харилцагч аж ахуй нэгж бусад байгууллагад төлсөн өдөр тутмын үйл ажиллагааг хэвийн явуулахад шаардагдах хангамжийн бараа материал, тээвэр, шатахуун, багаж хэрэгсэл зэрэг үйл ажиллагааны шууд зардлууд багтаж байгаа аж. Мөн татвар, хураамж, бусад төлбөр болон цалин хөлс зэргээс бүрдэж байгаа юм байна. 

Нийтдээ 480 орчим сая ам.долларын зарцуулалт хийсэн нь өнгөрсөн улиралд Монгол улсын валютын ханшийн тогтвортой байдалд эерэг хувь нэмэр оруулсан гэдгийг тэрбээр онцлов. 

Дотоодын худалдан авалт:  

Энэ улиралд дотоодын ханган нийлүүлэгч компани, аж ахуйн нэгжээс 1.3 их наяд төгрөгийн худалдан авалтыг хийссэн нь нийт худалдан авалтын 91 хувийг бүрдүүлж байгаа аж. 

Тэр дундаа Өмнөговь аймгийн компаниудаас 227 тэрбум төгрөгийн худалдан авалтыг хийсэн байна. 

Татвар хураамж: 

II улирлын нийт мөнгөн зарцуулалтын 19 хувийг улсын болон орон нутгийн төсөвт төлсөн татвар хураамж эзэлж байна. Нийт 306 тэрбум төгрөгийн татварыг төлжээ. Энэ нь өмнөх үеийн мөн үеэс 60 хувийн өсөлтийг үзүүлсэн байна.