Эхний долоон сард скүүтер, суррон дугуйнаас бэртсэн 178 хүн ГССҮТ-д хандаж, тусламж үйлчилгээ авчээ
Сүүлийн жилүүдэд скүүтер болон суррон дугуй, цахилгаан моторт тээврийн хэрэгслээс үүдэлтэй осол гэмтэл нэмэгдэх хандлагатай байгааг Гэмтэл Согог Судлалын Үндэсний Төв (ГССҮТ)-өөс анхааруулж байна.
Ялангуяа хүүхэд залуус, өсвөр үеийнхний дунд скүүтер, суррон дугуйн хэрэглээ нэмэгдсэнтэй холбоотойгоор
- гавал тархины эдийн гэмтэл
- ясны цууралт
- гар хөл буюу мөчдийн хугарал
- зөөлөн эдийн хөхрөлт няцралт
- цээжний хөндийн битүү гэмтэл
- хэвлийн эдийн гэмтэл зонхилон тохиолдож байгаа юм.
Нийслэлд дугуйн зам хангалттай хэмжээнд байхгүй, мөн цахилгаан моторт дугуйн хэрэгслийг явган хүний зам, авто замын хөдөлгөөнд оролцуулах тодорхой дүрэм журам байхгүйгээс үүдэн энэ төрлийн осол гэмтэл гарч байгааг холбогдох албаныхан мэдээлж буй.
Тиймээс скүүтер болон суррон дугуйгаар зорчиж буй иргэд авто замын хөдөлгөөнд оролцох үедээ автомашинд мөргүүлэх, хаалга хашлаганд цохиулах, явган зорчигчийг мөргөж гэмтээх, хоорондоо мөргөлдөх, хашаа хайс болон барилга байгууламж мөргөх, нүхэнд унах, онхолдож гэмтэх зэрэг тохиолдол цөөнгүй гарч байна.
ГССҮТ-ийн Яаралтай тусламжийн тасагт:
- 2022 онд нийт 96
- 2023 онд нийт 229
- 2024 оны эхний долоон сарын байдлаар нийт 178 тохиолдол бүртгэгдэж, тусламж үйлчилгээ авчээ.
Иймд скүүтер болон суррон дугуйгаар зорчих үед хурдаа тохируулах, зайлшгүй үед хэрхэн зогсоох мэдлэгтэй байх, хамгаалалтын хэрэгсэл хэрэглэх, зорчих үедээ анхаарал сарниулах, харагдах орчныг хязгаарлах, орчноос тусгаарлах гар утас, чихэвч, таблет зэргийг хэрэглэхгүй байж өөрийн болон бусдын эрүүл мэндэд анхаарал болгоомжтой хандахыг эрүүл мэндийн байгууллагаас сэрэмжлүүлэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
28 СЭТГЭГДЭЛТЭЙ
|
