Монгол Улс залуучуудын олимпын наадмыг зохион байгуулах хүсэлтээ илэрхийллээ
Олон Улсын Олимпын Хороо (ОУОХ)-ноос Залуучуудын Олимпын Наадмыг зохион байгуулах хүсэлтээ илэрхийлсэн үндэсний олимпын хороодын дунд дугуй ширээний уулзалтыг зохион байгууллаа. “Парис 2024” наадмын сүүлийн хагас эхэлсэн энэ цаг мөчид 10 гаруй улсын төлөөлөл уг уулзалтад уригджээ.
Энэхүү дугуй ширээний уулзалтад Соёл, Спорт, Аялал Жуулчлал, Залуучуудын сайд Ч.Номин, ОУОХ-ны гишүүн, Монголын Үндэсний Олимпын Хороо (МҮОХ)-ы ерөнхийлөгч Б.Баттүшиг нар оролцож, Монгол улсын залуучуудын олимпын наадмыг зохион байгуулах хүсэлтийг баталгаажуулж, товч танилцуулга хийлээ.
Манай улс 2023 онд Мумбай хотноо явагдсан ОУОХ-ны чуулганы үеэр 2030 эсвэл 2034 оны Залуучуудын зуны олимпын наадам, 2027 оны ОУОХ-ны чуулганыг зохион байгуулах хүсэлтээ илэрхийлээд байгаа билээ.
Уг арга хэмжээг ОУОХ-ны гишүүн, олимпын хошой аварга К.Ковентри ахалж, “Дакар 2026” наадмыг зохион байгуулах хорооны дарга И.Вэйд, “Буэнос Айрес 2018” наадмын зохион байгуулах хорооны дарга, Л.Ларроса тэргүүтэй хүндэт зочид байлцав.
Зочид залуучуудын наадмын үзэл санаа, спортын уралдаан тэмцээний онцлог, хэрэгжүүлсэн соёлын хөтөлбөрүүдийн талаар сайн туршлагуудаа хуваалцлаа.
Залуучуудын Олимпын наадам хамгийн анх 2010 онд Сингапур улсад зохион байгуулагдсан бөгөөд 15-18 насны тамирчдын дунд явагддагаараа онцлогтой. Залуучуудын наадмыг зөвхөн спортын уралдаан тэмцээнээс гадна тогтвортой хөгжлийг эрхэмлэсэн, байгальд ээлтэй, залуучууд руу чиглэсэн дэд бүтэц, боловсрол, хувь хүний хөгжлийн урт хугацааны хөрөнгө оруулалт бүхий цогц байдлаар зохион байгуулах бодлогыг ОУОХ-оос хэрэгжүүлдэг.
Хамгийн сүүлд 2024 оны нэгдүгээр сард Залуучуудын өвлийн олимпын наадам БНСУ-ын Канвон хотноо зохиогдсон. Дараагийн зуны наадам 2026 оны аравдугаар сарын 31-нд Дакар хотноо нээгдэх бөгөөд 35 спортын 244 төрөлд 5000 гаруй тамирчин оролцох төлөвтэй байна. Энэ нь олимпын наадам анх удаа Африк тивд явагдах тохиолдол болж байгаа юм.
Эх сурвалж: Монголын Үндэсний Олимпын Хороо
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
