Гэрэл зургийг MPA агентлагийн онцгой зөвшөөрөлтэйгөөр ашиглав

Ховд аймгийн Мянгад сумын нутаг Өндөр хөхийн-Уулын ар бэл гэдэг газар долдугаар сарын 30-ны 09:00 цагийн орчим гурван хүн малаа хариулж яваад аянгад цохиулсан. 

Үүний улмаас хоёр хүүхэд нас барж, нэг хүн нь эмнэлэгт хүргэгдсэн байна. Энэ талаарх мэдээллийн дагуу Мянгад сумын Эрүүл мэндийн төвийн эмч долдугаар сарын 30-ны 11:30 цагт очиход 17 настай хоёр хүү нар аянгад цохиулж нас барсан байсан бөгөөд иргэн 25 настай эрэгтэйн биеийн байдал хүнд байсан тул Ховд аймаг дахь Бүсийн оношилгоо эмчилгээний төв руу хүргүүлсэн тухай мэдээллийг тус сумын Засаг дарга аймгийн Онцгой байдлын газарт мэдээлсэн.

Дээрх харамсалтай явдлын талаарх мэдээллийг онцгой байдлын алба наймдугаар сарын 5-ны 09:35 цагт хүлээн авчээ.

Аянга цахилгаантай үед анхаарах зөвлөмж:

• Ил задгай саванд шатамхай бодис хадгалахгүй байх
• Өндөр уулын орой, тэгш тал газрын голд болон нүцгэн хадан дээр байрлахгүй байх
• Радио телевиз, гар утас зэргийг унтраах
• Аянга цахилгаантай үед нейлон, пролонон хувцастай байх
• Саваа модон хэлбэртэй зүйлийг толгой дээрээ барихгүй байх
• Машин дээр аянга буусан ч дотор нь дамжиж орохгүй. Тиймээс цонхоо заавал хааж, дээвэр цонхноос зайдуу суух
• Аянга нижигнэх дуу гармагц мориноосоо бууж, доош суух
• Модноос дөрвөн метрээс дээш зайнд холдож суух
• Цахилгааны шонгоос хол байх
• Гэрийн янданг яаралтай авч, өрхөө бүтээх, телевизийн антеныг брезинт буюу даавуугаар бүтээх

 

Эх сурвалж: Онцгой Байдлын Ерөнхий Газар