ПАРИС 2024: Монголын жүдогийн багийн тэмцээн өндөрлөлөө

Жүдо бөхийн холимог багийн аварга шалгаруулах тэмцээн өнөөдөр болж байна. 

Жүдо бөхийн холимог багийн төрөл нь өнгөрсөн Токио 2020 Олимпын наадмаас хөтөлбөрт багтаж эхэлсэн. Нэг багт эрэгтэй гурав, эмэгтэй гурван жүдоч багтах ба эрэгтэйчүүд -73кг, -90кг, +90кг, эмэгтэйчүүд -57кг, -70кг, +70кг жинд барилддаг.

Монголын баг тамирчид С хэсэгт сугалаа татсан. Монгол багт:

Эмэгтэй

- 57 кгд Олон улсын хэмжээний мастер Л.Сосорбарам

- 70 кгд Монгол Улсын гавьяат тамирчин Л.Энхрийлэн

+ 70 кгд Олон улсын хэмжээний мастер А.Адьяасүрэн

Эрэгтэй

- 73 кгд Монгол Улсын гавьяат тамирчин Ё.Басхүү

- 90 кгд Олон улсын хэмжээний мастер Б.Эрдэнэбаяр

+ 90 кгд Олон улсын хэмжээний мастер Б.Гончигсүрэн нар барилдлаа. 

Ийнхүү багийн барилдаанд Монголын тамирчид Израилын багт 4:3 харьцаагаар хожигдож тэмцээнээ өндөрлүүллээ. 

Манай жүдочид эхний даваанд Израилийн багтай сугалаа таарсан. Эхлээд гурав дараалан хожигдож хүнд байдалд орсон ч сүүлийн гурван барилдаанд дараалан ялснаар 3:3-аар тэнцсэн юм. Ингээд сугалаагаар нэмэлт барилдаан хийх жинг тодруулахад эрэгтэйчүүдийн -90 кг таарч, энэ жинд барилдсан Б.Эрдэнэбаяр Израилийн Саги Мүкитэй хүч үзэв. Тэдний барилдаан цаг сунгасны эцэст израиль жүдоч вазари үнэлгээ авснаар багтаа ялалт авчирлаа.