Гэрэл зургийг MPA агентлагийн онцгой зөвшөөрөлтэйгөөр ашиглав

Онцгой байдлын байгууллагад өнгөрсөн долоо хоногт Увс, Ховд, Завхан аймагт аянга буусан нийт таван тохиолдол бүртгэгдэв.

Тухайлбал Увс аймагт айлын гэр дээр аянга бууж нэг иргэн нас барсан байна. Дээрх таван тохиолдлын улмаас нийт 31 бод мал, 30 бог мал, нийт гурван малчин өрхийн 61 мал хорогджээ.

Ойрын өдрүүдэд нутгийн төв хэсгээр дуу цахилгаантай аадар бороо, бороо үргэлжлэн орохыг Цаг уурын байгууллагаас анхааруулж буй.

Иймд малчид, ард иргэд мөндөр, аянга цахилгаан, болзошгүй үер усны аюулаас сэрэмжтэй байхыг Онцгой Байдлын Ерөнхий Газраас онцгойлон анхааруулж байна.

Аянга цахилгаантай үед анхаарах зөвлөмж:

• Ил задгай саванд шатамхай бодис хадгалахгүй байх
• Өндөр уулын орой, тэгш тал газрын голд болон нүцгэн хадан дээр байрлахгүй байх
• Радио телевиз, гар утас зэргийг унтраах
• Аянга цахилгаантай үед нейлон, пролонон хувцастай байх
• Саваа модон хэлбэртэй зүйлийг толгой дээрээ барихгүй байх
• Машин дээр аянга буусан ч дотор нь дамжиж орохгүй. Тиймээс цонхоо заавал хааж, дээвэр цонхноос зайдуу суух
• Аянга нижигнэх дуу гармагц мориноосоо бууж, доош суух
• Модноос дөрвөн метрээс дээш зайнд холдож суух
• Цахилгааны шонгоос хол байх
• Гэрийн янданг яаралтай авч, өрхөө бүтээх, телевизийн антеныг брезинт буюу даавуугаар бүтээх