ХУУЧИРСАН МЭДЭЭ: 2024/07/08-НД НИЙТЛЭГДСЭН

Баяр наадмын өдрүүдэд болзошгүй эрсдэлээс сэргийлэх ЗӨВЛӨМЖ

П.Сайнжаргал, IKON.MN
2024 оны 7 сарын 8
iKon.MN
Зураг зураг
Гэрэл зургийг MPA агентлагийн онцгой зөвшөөрөлтэйгөөр ашиглав

Гэмтэл Согог Судлалын Үндэсний Төв (ГССҮТ)-өөс баяр наадамтай холбоотойгоор сэрэмжлүүлэг, зөвлөмж хүргэлээ. 

Өнгөрсөн оны долдугаар сард мориноос унаж бэртсэний улмаас 370 хүн тусламж үйлчилгээ авсан байна. Үүнээс 204 нь 0-18 насны хүүхэд байжээ.

Түүнчлэн өнгөрсөн онд 35 хүн уралдааны мориноос унаж бэртсэн мэдээлэл бий. 

Энэ оны эхний зургаан сард мориноос унаж бэртсэн нийт 601 хүн тусламж үйлчилгээ авснаас 269 нь хүүхэд байна.

Тэр дундаа уралдааны мориноос унаж бэртсэн 13 хүүхэд байгаа бол, үлдсэн 256 нь уналгын мориноос унаж бэртжээ.

Тиймээс үндэсний их баяр наадам, аймгуудын тэмдэглэлт ойн баярын эдгээр өдөр иргэд та бүхэн өөрийн болон хайртай гэр бүл, ойр дотны хүмүүсийнхээ амь нас, эрүүл мэндэд анхаарал тавьж, зам тээврийн осол болон болзошгүй аюул эрсдэлээс урьдчилан сэргийлэхийг зөвлөж байна.

Хөдөө орон нутагт зорчих тохиолдолд: 

  • Тээврийн хэрэгслийн бүрэн бүтэн байдлыг шалгах
  • Авто замын хөдөлгөөнд анхаарал болгоомжтой оролцох
  • Тээврийн хэрэгсэл жолоодох үедээ архи согтууруулах ундааг хэрэглэхгүй байх
  • Зам тээврийн ослоос урьдчилан сэргийлэхийг анхааруулж байна.

Түүнчлэн бага насны хүүхдэд тавих хараа хяналтаа сайжруулах, хорхог боодог хийх болон бусад төрлийн идээ ундааг бэлтгэхдээ өөрсдийн болон ойр тойрны хүмүүсийн аюулгүй байдлыг хангаж түлэгдэж гэмтэхээс сэргийлэх, мөн гол ус, нуур цөөрмийн дэргэд анхаарал болгоомжтой байж аялал зугаалгад оролцох нь хамгийн чухал юм.  

Баяр наадмын өдрүүдэд гарсан осол гэмтлийн дийлэнх шалтгаан нь архи дарс хэтрүүлэн хэрэглэснээс үүдэлтэй байдаг бөгөөд өнгөрсөн оны долдугаар сард ахуйн хүрээний архидалттай холбоотой зодоон цохион, гэр бүлийн хүчирхийлэлд өртсөн 104 хүн ГССҮТ-д тусламж үйлчилгээ авсан байна.