Д.Цогтбаатар: Хамтрал нэрээр АН-ын хэдэн дарга, ашиг хонжоо хайгчдыг ажилд авах гэж байгаа бол намдаа элсүүлээд авчхаарай
Ерөнхий сайдын томилгоотой холбоотойгоор гишүүд үг хэлэв. Үг хэлсэн гишүүдийн заримаас нь онцолж байна.
Н.Алтанхуяг: Л.Оюун-Эрдэнэ та харин овоо юм. Гурван жил суучхаад ахиад сунгах гэж байна
УИХ-ын гишүүн Н.Алтанхуяг: Ерөнхий сайдын ажил хэцүү. Би ойлгож байна. Л.Оюун-Эрдэнэ та харин овоо юм. Гурван жил суучхаад ахиад сунгах гэж байна. Намайг наана чинь хоёр жил болов уу үгүй юу хүний өөрийнгүй нийлж боорлож байгаад огцруулаад хаячхаж байсан юм.
Та УИХ-д орж ирж мэдээлэл хийж бай л даа. Би 14 хоног тутамд мэдээлэл хийдэг байсан. Өнгөрөн дөрвөн жилийн хугацаанд би таныг хараагүй. Энэ их буруу шүү.
Санхүү, эдийн засгийн бодлогоо гайгүйхэн амьтанд өгчих л дөө. Танайд энэ чиглэлээр олигтой амьтан байхгүй болчихсон юм уу.
Ж.Алдаржавхлан: Нийслэлийн асуудал эрхэлсэн байнгын хороотой болох шаардлагатай
УИХ-ын гишүүн Ж.Алдаржавхлан: Нийслэлийн асуудал эрхэлсэн байнгын хороотой болох шаардлагатай байна.
Хоёрдугаарт, сөрөг хүчнийхэн юу ч байсан эсэргүүцнэ гэдэг бодлоготой байх юм бол Монгол Улс хохирно. Тиймээс бидний зөв бодлогыг өөрсдийн санаачилгатайгаа хэрэгжүүлээд явбал яасан юм санал байна.
Д.Цогтбаатар: МАН ялсан гэж үзэж байгаа бол Засгаа дангаараа байгуулаад яваасай
УИХ-ын гишүүн Д.Цогтбаатар: Хувь гишүүний үүднээс сонгогчдоос ирүүлсэн саналуудыг Ерөнхий сайдад хэлье.
Эрх баригчид өнгөрсөн хугацаанд хүний эрх, хэвлэлийн эрх чөлөөг уландаа гишгэсэн. Энэ тал дээр анхаарч ажиллаасай гэж хүсэж байна.
Хууль сахиулагчдад улстөрчид нөлөөлдөг байдлыг таслан зогсоож өгөөрэй.
МАН ялсан гэж үзэж байгаа бол Засгаа дангаараа байгуулаад яваасай. Хамтрал нэрээр АН-ын хэдэн дарга, ашиг хонжоо хайгчдыг ажилд авах гэж байгаа бол намдаа элсүүлээд авчхаарай.
М.Нарантуяа-Нара: Хэрэглэж дассан Түүхий нүүрсээ түлье
УИХ-ын гишүүн М.Нарантуяа-Нара: Ерөнхий сайд улиран томилогдсоноор Засгийн газрын мөрийн хөтөлбөр шинэчлэгдэх үү, үргэлжлэх үү.
Өнгөрсөн дөрвөн жилийн хугацаанд сайжруулсан түлшний улмаас олон хүн амиа алдсан. Тиймээс хэрэглэж дассан түүхий нүүрсээ түлье гэдэг саналыг иргэд тавьж байна. Тэгэхээр Засгийн газрын түвшинд иргэддээ баталгаа гаргаж өгөх хэмжээний ажил хийгээсэй гэж хүсэж байна. Мөн нийт гишүүдээс Гэр бүлийн хуулийн дэмжихийг хүсэж байна.
Б.Түвшин: Ерөнхий сайд Л.Оюун-Эрдэнийн “Тэгвэл та нар оролцоод яв л даа” гэж хэлсэн нь маш их таалагдлаа
УИХ-ын гишүүн Б.Түвшин: Д.Амарбаясгалан дарга аа, ордны хоронд орчихов оо. Бичиг цаасаа сайн шалгаж байгаарай.
Ерөнхий сайд Л.Оюун-Эрдэнийн “Тэгвэл та нар оролцоод яв л даа” гэж хэлсэн нь маш их таалагдаж байна. Яг ийм байдлаар явах юм бол болж байна. Бид оролцоно. Оролцох оролцохдоо маш их санал санаачилгатай, гомдоллож шүүмжлэхгүй явна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
