Гэрэл зургийг MPA агентлагийн онцгой зөвшөөрөлтэйгөөр ашиглав

"Дотоодын аялал жуулчлалын 2024 оны чиг хандлага, таамаглал" сэдэвт судалгааны үр дүнг танилцуулах хэвлэлийн бага хурал өнөөдөр зохион байгуулагдлаа. 

Энэ үеэр Монголын аялал жуулчлалын судалгаа, зарим таамаглалын талаарх мэдээллийг “Улаанбаатар аялал жуулчлалын холбоо” НҮТББ-ын судлаач Б.Ербахыт танилцуулав. 

 "Дотоодын аялал жуулчлал амь насаа алдахын төлөөх уралдааны талбар баймааргүй байна”

Тэрбээр "Хүмүүс ихээр аялж, зочилж буй газруудад үүсэх сөрөг үр дагаврууд ч байна. 

Байгальд хог хаях, олон салаа зам үүсгэх, үйлчилгээний байгууллагууд үнийн хөөрөгдөл бий болгох зэргээр илэрч буй. 

Ийм учраас мэргэжлийн байгууллагуудаас тодорхой зөвлөмжүүдийг өгөх нь зүйтэй. 

Тооцоо судалгаанаас үзэхэд Улаанбаатар хотоос гарсан 3,650 хүн тутамд зам тээврийн осолд өртөх эрсдэл тулгардаг. Хотоос гарсан нийт аялагчийн 0.002 хувь нь амь насаа алдах эрсдэлтэй гэж байгаа.

Дотоодын аялал жуулчлал амь насаа алдахын төлөөх уралдааны талбар баймааргүй байна гэдгийг мэргэжлийн байгууллагууд хэлж, сэрэмжлүүлсээр буй" хэмээв. 

"Аялал аз жаргалтай эхэлсэн бол аз жаргалтай дуусах ёстой" 

Үргэлжлүүлэн "Аялалд гарахдаа анхаарах ёстой зөвлөмжийг хүргэе. 

Хотоос 245,000 машин гарч хөдөө орон нутгийг зорихоор байна. Энэ дунд замын хөдөлгөөний дүрэм, аюулгүй байдлаа сахидаггүй зэрэг олон төрлийн хандлагатай жолооч нар байгаа. 

Аялал аз жаргалтай эхэлсэн бол аз жаргалтай дуусах ёстой. Хамгийн түрүүнд замын хөдөлгөөний аюулгүй байдлаа хангаж аялахыг нийт аялагчаас хүсэж байгаа.

Аяллаар яваа хүмүүст 1,000 километр давхиж очоод хоёр, гурван хоног архидаад буцаад ирдэг хандлага байна. 

Гэхдээ үзэх үзмэрээ ч үзэж чадалгүй буцаад ирдэг ийм байдал өөрчлөгдөж байгаа. Тиймээс аялагч та бүхэндээ хүнсний аюулгүй байдлаа дээд зэргээр хангахыг зөвлөе" гэлээ.