XOM: 2024-2028 оны парламентын 126 гишүүний 102 нь ТЭРБУМТАН

Гэрэл зургийг MPA агентлагийн онцгой зөвшөөрөлтэйгөөр ашиглав

2024-2028 оны парламентад суух 126 хүн өнөөдөр Улсын Их Хурал(УИХ)-ын гишүүний үнэмлэхээ авч байна. 

Тэдний 102 нь тэрбум ба түүнээс дээш хэмжээний хөрөнгөтэй бол 24 нь 263-976 сая төгрөг хүртэлх хөрөнгөтэй гэж Авлигатай Тэмцэх Газарт мэдүүлжээ. 

Шинэ гишүүдийн хөрөнгө орлогын мэдүүлгээс харвал Соёлын сайд, УИХ-д анх удаа сонгогдсон Ч.Номин 59.8 тэрбум төгрөгийн хөрөнгөөрөө шинээр байгуулагдсан парламентын танхимдаа "толгой цохиж байна". Түүний өөрийн орлого нь жилийн 245.4 сая төгрөг бөгөөд 17.3 тэрбум төгрөгийн үнэ бүхий үл хөдлөх, 1.8 тэрбум төгрөгийн хадгаламж, 750 сая төгрөгөөр үнэлэгдэх үнэт эдлэлтэй.

Харин түүний араас хөрөнгөөрөө хоёрдугаарт эрэмбэлэгдэж буй нь Б.Түвшин. Мөн л УИХ-д анх удаагаа сонгогдсон тэрбээр 36.2 тэрбум төгрөгийн хөрөнгөтэй. Жилийн 9.8 тэрбум төгрөгийн орлоготой тэрбээр 10.4 тэрбумаар үнэлэгдэх үл хөдлөх хөрөнгө, 13.2 тэрбум төгрөгийн авлагатай, харин зээлгүй, хадгаламжгүй гэж мэдүүлжээ. 

Жагсаалтаар нэр дэвшиж, дөрвөн жилийн хугацаанд УИХ-ын гишүүнээр ажиллах гэж буй "Шарк" Д.Энхтүвшин 33.9 тэрбум төгрөгийн хөрөнгөөрөө "анги"-даа гуравдугаар жагсав. Малгүй, газаргүй, ямар нэг хадгаламжгүй гэж мэдүүлсэн Д.Энхтүвшингийн өөрийн орлого нь жилийн  344 сая төгрөг, гэр бүлийн орлого нь 530 сая төгрөг юм байна. Харин үнэт эдлэлийнх нийт үнэлгээ нь долоон тэрбум төгрөг. 

Тэгвэл энэ удаагийн парламентын хамгийн "ядуу" нь Б.Батбаатар болж байна. Тэрбээр өөрийн нийт хөрөнгөө 243 сая төгрөг гэж мэдүүлжээ. Түүний мэдүүлсэн хөрөнгийн хэмжээ нь "анги"-ийн хамгийн баян гишүүний нэг жилийн орлоготой нь дүйж байна.

Энд сануулахад гишүүдийн хөрөнгөд өр зээлийг оруулан тооцсон байгааг анхаарна уу.

График #1: УИХ-д сонгогдсон гишүүдийн хөрөнгө орлогын мэдүүлэг

Түүнчлэн парламентын 126 гишүүнээс хамгийн өндөр үнэ бүхий малтай нь Д.Батбаяр бөгөөд нийт үнэлгээ нь 8.8 тэрбум төгрөг байна. Харин энэ удаагийн парламентын гишүүдийн талаас илүү нь малгүй гэж мэдүүлсэн байна. 

Харин хурдан удмын адуугаар нь шинэ гишүүдийг жагсаавал 146 адуутай Ц.Баатархүү түрүү магнайд тодорч, аман хүзүүнд 110 адуутай Д.Батбаяр, айргийн гуравт 64 адуутай Ж.Бат-Эрдэнэ нар багтах нь. Харин тэдний араас тус бүр 50 адуутай Ж.Баясгалан, П.Ганзориг, Д.Ганмаа, Э.Одбаяр нар зуузай холбож байна.

График #1: УИХ-д сонгогдсон гишүүдийн мал аж ахуй