Беларусийн ерөнхийлөгч Монголд ирэхээсээ өмнө дотоодын үйлдвэрийн сүхний ирийг шалгав

Беларусь улсын ерөнхийлөгч Александр Лукашенко өнөөдөр Монгол улсын нийслэл Улаанбаатар хотод айлчлан ирэх гэж байна.

Түүний айлчлал гурав хоног үргэлжилж, зургаадугаар сарын 4-нд буцах тухай албаны эх сурвалжууд мэдээлж байгаа.

Лукашенко өчигдөр дотоодынхоо үйлдвэрийн бүтээгдэхүүнийг биечлэн шалгасан дүрс бичлэгийг нийтэлжээ.

Тухайлбал түүний Беларусьт үйлдвэрлэсэн сүхний ирийг шалган мод хагалж байгааг харуулсан дүрс бичлэгийг тус улсын төв мэдээний агентлаг БелТА нийтэд үзүүлсэн байна.

Лукашенко шалгасныхаа дараа “Сайн сүх байна. Гэхдээ ажиллах шаардлагатай” гэж хэлжээ.

Тэрбээр тавдугаар сарын 29-ний өдөр Орша хот дахь Легмаш үйлдвэрт зочлохдоо энэ сүхийг бэлэгт авсан юм байна. Ингэхдээ тэр гадаадын үйлдвэрийн бүтээгдэхүүнээс дутахааргүй бүтээгдэхүүн үйлдвэрлэхийг удирдлагуудад нь захиж, бэлгийн сүхээ өөрийн биеэр шалгахаа амлаж байжээ.

Өчигдөр бас Беларусийн сөрөг хүчнийхэн Лукашенкогийн айлчлалыг эсэргүүцсэн мэдэгдэл гаргажээ. Хүн төрөлхтний эсрэг гэмт хэрэг үйлдсэн Лукашенког айлчлан ирэхэд нь Олон Улсын Эрүүгийн Шүүхийн гишүүн Монгол улс баривчлах үүрэгтэйг тэд сануулсан байна.

Тухайлбал Беларусийн Шилжилтийн Нэгдсэн засгийн газрын дэд тэргүүн Павел Латушка “Лукашенко зургаадугаар сарын 1-ээс 4-ний хооронд Ромын дүрэмд нэгдэн орсон Монгол Улсад дөрвөн өдрийн төрийн айлчлал хийхээр бэлтгэж байна. Өнгөрсөн арванхоёрдугаар сард Олон Улсын Эрүүгийн Шүүхийн шүүгчээр Монгол улсын төлөөлөл сонгогдсон билээ.

Энэхүү гэмт хэрэгтэн нь Украины эсрэг түрэмгийлэлд оролцож, Оросын эзэлсэн нутаг дэвсгэрээс 4,000 гаруй хүүхдийг хууль бусаар дүрвүүлсэн. Лукашенко нь Беларусь улсад хүн төрөлхтний эсрэг гэмт хэрэг үйлдсэнийхээ хариуцлагыг хүлээх ёстой хүн. Тэрбээр улс төрийн мөрдлөг хавчлагыг төрийн бодлогын хэмжээнд хэрэгжүүлсний улмаас олон арван мянган хүн эрүү шүүлт, хүчирхийллийн золиос болж, хууль бусаар шоронд хоригдсон. Наад зах нь 300,000 хүн албадан гаргах гэмт хэргийн золиос болсныг Олон Улсын Эрүүгийн Шүүх тогтоосон. Энэхүү айлчлал нь олон улсын хамтын нийгэмлэг болон олон улсын шударга ёсны тогтолцоог нийтийн өмнө доромжилж буй үйлдэл юм” гэж сошиал хуудсандаа бичжээ.

Эх сурвалж: BelTA