Б.Бат-Эрдэнэ: Бид Парисын олимпод оролцох 55 эрх авах зорилготой. Нэг тамирчинд ₮83-84 сая зарцуулна
-Дахин нийтлэв-
УИХ-ын хаврын ээлжит чуулганы өнөөдрийн хуралдаанаар Засгийн газрын 2020-2024 оны үйл ажиллагааны хөтөлбөрийн 2023 оны хэрэгжилт, төлөвлөгөөний гүйцэтгэлийн тайланг 2024 оны гуравдугаар сарын 21-нд хэлэлцэж байв.
Энэ үеэр УИХ-ын гишүүн Г.Мөнхцэцэг 2024 оны Парисын олимпын бэлтгэл ажил хэрхэн хангадаж байгаа талаар салбарын сайдаас тодруулж байжээ.
Олимп, нийтийн биеийн тамир, спортын Үндэсний хорооны дарга Б.Бат-Эрдэнэ: Олимпын бэлтгэлийг хангахад спортын 27 холбоотой гэрээ байгуулаад явж байна. Спортын холбоод шигшээ баг байгуулж, тамирчид болон дасгалжуулагчдаа сонгоно.
Өнөөдрийн байдлаар олимпын спортын төрлөөр 11, пара спортын төрлөөр дөрвөн хүн эрхээ авсан. Бид энэ жилийн олимпод оролцох 55 эрх авах зорилготой.
Энэ жил олимпын нэг тамирчинд 83-84 сая төгрөг зарцуулна. 2018 онд 31-32 сая төгрөг, 2023 онд 43-44 сая төгрөгийг олимпод оролцож буй нэг тамирчинд зарцуулдаг байсан.
Энэ нь бүрэн хэмжээнд асуудлыг шийдсэн зүйл биш. Нөгөө талдаа спортод дуртай компаниудын хамтын дэмжлэгтэйгээр бэлтгэл ажил бүрэн явагдаж байгаа. Мөн манай улс 2024 оны олимпод оролцох бүрэн эрхтэй.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
