С.Чулуун: Нант хот дахь "Чингис хаан-Монголчууд дэлхийг өөрчилсөн нь" үзэсгэлэнд 800 гаруй үзмэр дэлгэгдсэн

Бүгд Найрамдах Франц Улсын Нант хотод "Чингис хаан-Монголчууд дэлхийг өөрчилсөн нь" үзэсгэлэн өчигдөр нээгдлээ.

Үзэсгэлэнгийн ач холбогдлын талаар Нант хотод очоод буй "Чингис хаан" үндэсний музейн захирал С.Чулуун мэдээлэл өгсөн юм.

Тэрбээр "Хоёр улсын Ерөнхийлөгчийн ивээл дор Монгол Улсын "Чингис хаан" үндэсний музей болон Францын Нант хотын Түүхийн музей хамтарсан "Чингис хаан-Монголчууд дэлхийг өөрчилсөн нь" үзэсгэлэн дэлгэгдэж байна. Үзэсгэлэн саад бэрхшээлийг даван туулж зохион байгуулагдлаа. Анх өөр улсад зохион байгуулахаар ажилласан ч бүтээгүй.

Чингис хааны дэлхий дахины түүхэнд гүйцэтгэсэн үүргийг цогцоор нь ойлгуулах зорилготой үзэсгэлэн.

Хоёрдугаарт "Чингис хаан" үндэсний музей байгуулагдаад анх удаа Европын соёлын уламжлалтай Франц улсад энэхүү үзэсгэлэнг гаргаж буйгаараа онцлогтой.

Гуравдугаарт үзэсгэлэнд 20 орчим музей хамтарч оролцож байна. Тухайлбал Лувр, Брэнли зэрэг музейтэй хамтарч гаргалаа.

Үзэсгэлэнд 800 гаруй үзмэр дэлгэгдсэн. Ил хаадын үеийн болон Алтан ордны, Юань улсын үеийн үзмэрүүд бий. Монголын эзэнт гүрний үед монголчууд урлаг, соёл, хот байгуулалт, засаг захиргааны өөрчлөлт, улс төр, худалдаа эдийн засгийн хувьд Евро Азийн орнуудад хэрхэн нөлөө үзүүлснийг таниулах юм.

Энэ үеэр олон улсын эрдэм шинжилгээний хурал, морин хуурын чуулгын тоглолт, соёлын бүтээлч үйлдвэрлэлийн нэгдсэн үзэсгэлэн гарч, бүх үзмэрүүдийн талаар франц хэл дээр каталоги гаргасан нь Монголын түүхийг олон улсад сурталчилна.

Мөн Телеграмм, Бонди зэрэг сэтгүүлүүдэд Монголын тухай мэдээллийг өгч байгаа. Энэ нь Европын улс орнууд төдийгүй дэлхий дахин Чингис хааны түүхийг зөв ойлгуулах ач холбогдолтой.

Уг үзэсгэлэн ирэх жил Монгол, Чех, Канад, АНУ, БНСУ зэрэг улсад 2027 он хүртэл үргэлжлэх захиалга ирээд байгаа" хэмээн тайлбарлалаа.

"Чингис хаан-Монголчууд дэлхийг өөрчилсөн нь" үзэсгэлэн Нант хотод 2024 оны тавдугаар сарын 5-н хүртэл зохион байгуулагдана.

Үзэсгэлэнгийн эхний өдөр урт дараалал үүссэн байлаа.

Үзэсгэлэн нь дараах сэдвийн дагуу 7 хэсэг, цаг үед хамаарч байна.

​1. Танилцуулах хэсэг:

Монголын эзэнт гүрэн ба Францын хаант улс

​2. Чингис хааны өмнөх талын эзэнт гүрнүүд

(Хүрэл зэвсгийн үеэс XII зуун)

​3. Чингис хаан (1160-1227)

​4. Эзэнт Гүрэн (1228-1368)

​5. Монголын их солилцоо

​6. Шинэ ертөнц ба эзэнт гүрний бутрал

​7. Төгсгөл хэсэг, уусах орон зай

БНФУ-ын Нант хотын Бретанийн Гүнгийн ордон буюу Түүхийн музейд "Чингис Хаан - Монголчууд дэлхийг өөрчилсөн нь" үзэсгэлэнгийн нээлтэд оролцсоноор Монгол Улсын Ерөнхийлөгч У.Хүрэлсүхийн тус улсад хийж байгаа төрийн айлчлал өндөрлөлөө.