ТӨСВИЙН ТӨСӨЛ 2024: Нийслэлийнхэн тоггүй, дулаангүй болох эрсдэл байсаар байгаа ч ирэх онд соёлын салбарт илүү их мөнгө зарцуулна
2024 оны Улсын төсвийн төслийг Улсын Их Хуралд есдүгээр сарын 29-нд өргөн барьж, Сангийн яам өөрийн цахим хуудсандаа байршуулсан.
Цахим хуудсанд байршсан мэдээллээс ирэх онд сайд нарын захиран зарцуулах мөнгөн дүнг онцлон танилцуулж байна.
2024 онд Монгол Улсын Ерөнхий сайд 600 тэрбум төгрөгийн орлого төвлөрүүлж, 330 тэрбумыг зарцуулахаар байна. Тодруулбал урсгал зардалд 279 тэрбум төгрөг, хөрөнгийн зардалд 50.7 тэрбум төгрөг зориулахаар төлөвлөжээ.
Сайд нараас хамгийн их дүнг захиран зарцуулах эрхтэй нь Сангийн сайд Б.Жавхлан. Тэрбээр ирэх онд 4.6 их наяд төгрөг захиран зарцуулахаас 1.2 их наяд нь зээлийн хүүгийн төлбөр, гадаад зээл тусламжаас санхүүжих зардал нь 1.8 их наяд төгрөг байгаа юм.
Түүнчлэн Боловсрол, шинжлэх ухааны сайдад 4.3 их наяд төгрөг тусгажээ. Үүний 3.5 их наяд нь урсгал, 709 тэрбум нь хөрөнгийн зардал байна. Боловсролын багц хууль, бодлогын өөрчлөлттэй холбоотойгоор 155.3 тэрбум төгрөгийн урсгал зардал энэ салбарт нэмэгдэж байна. Тухайлбал хөдөө орон нутгийн тэтгэмжийг эхний удаад таван жил, дараагийн удаагаас гурван жил тутам зургаан сарын цалинтай тэнцэх хэмжээгээр олгоход 75.8 тэрбум төгрөг, багш мэргэжлээр суралцах хүүхдүүдийн төлбөрт 13 тэрбум төгрөгийг төсвөөс гаргах юм.
Хамгийн бага төсөвтэй нь Монгол Улсын сайд, Боомтын сэргэлтийн Үндэсний хорооны дарга Б.Тулга бөгөөд тэрбээр ирэх онд 11.3 тэрбум төгрөгийг захиран зарцуулна.
Соёлын сайдад ирэх онд 402.4 тэрбум төгрөг захиран зарцуулах эрх олгосон байгаа нь олон нийтийн шүүмжлэлийг дагуулж буй. Учир нь эрчим хүчний асуудал нэн тулгамдаж байхад энэ салбараас илүү давсан төсвийг соёлын салбарт зориулах нь цагаа олсон алхам мөн эсэхэд иргэд эргэлзсээр. Хүйтэн сэрүүний цаг дөхөх тусам өвлийг өнтэй давж чадах болов уу гэх айдас иргэдэд төрдөг болсоор хэдэн жил болж байна.
Нийслэлийнхэн тоггүй, дулаангүй болох эрсдэл оршин байсаар байгаа энэ үед Эрчим хүчний сайд ирэх онд 359.8 тэрбум төгрөгийг захиран зарцуулна. Тус салбарт ирэх жил нийт 605.4 тэрбум төгрөгийн өртөг бүхий хөрөнгө оруулалтын төслүүдийг хэрэгжүүлэхээс 2024 оны улсын төсөвт 254.6 тэрбум төгрөгийг нь төлөвлөөд байна. Жил бүр их хэмжээний алдагдал хүлээдэг эрчим хүчний салбарынхан энэ онд гэхэд 200 орчим тэрбум төгрөгийг алдагдал хүлээж буйг Б.Чойжилсүрэн сайд хэлж байв.
Мөн аялал жуулчлалын хөгжүүлэх хөгжилд анхаарна гэсэн атал хариуцсан салбарт нь 226 тэрбум төгрөг тусгажээ. Энэ нь соёлын салбараас бараг хоёр дахин бага дүн юм.
