"ХЗДХ-ийн сайдаар Б.Энхбаяр, Түгжрэлийг бууруулах үндэсний хорооны даргаар Б.Дэлгэрсайханыг томилох улс төрийн шийдвэр гарлаа"

Гэрэл зургийг MPA агентлагийн онцгой зөвшөөрөлтэйгөөр ашиглав

Монгол Ардын Нам(МАН)-ын Удирдах зөвлөлийн хурал өнөөдөр болов.

Уг хурлаар Нийслэлийн Засаг дарга бөгөөд Улаанбаатар хотын даргад Х.Нямбаатарыг томилох, үүнтэй холбоотойгоор түүний оронд Б.Энхбаярыг томилох, Монгол Улсын сайд, Түгжрэлийг бууруулах үндэсний хорооны дарга УИХ-ын гишүүн Б.Дэлгэрсайханыг томилох зэрэг асуудлыг хэлэлцжээ.

Шийдвэрийн талаар МАН-ын Ерөнхий нарийн бичгийн дарга А.Ариунзаяа танилцуулахдаа "МАН-ын Удирдах зөвлөл гурван цаг 30 минут хуралдаж, гурван асуудлыг шийдвэрлэлээ. 

1. Хотын даргаар одоогийн Хууль зүй, дотоод хэргийн сайд Х.Нямбаатарыг нэр дэвшүүлж, улс төрийн бодлогоо намын дарга танилцуулсан. Сонгинохайрхан дүүргээс ажлаа эхлүүлж байсан, дүүрэг болон хотын ажлыг мэднэ. Хууль зүйн сайдаар сайн ажилласан. Нэн ялангуяа хотод үүсээд байгаа нөхцөлтэй холбогдуулан олон хариуцлагын асуудал яригдах учраас Х.Нямбаатар сайд хотын даргаа томилогдох нь зүйтэй гэдэг саналыг танилцуулж, Удирдах зөвлөл 100 хувь дэмжлээ. 
2. Улаанбаатар хотын түгжрэлийг хариуцсан сайд буюу үндэсний хорооны даргаар УИХ-ын гишүүн Б.Дэлгэрсайханыг нэр дэвшүүлсэн. Тэрбээр УИХ-д хоёр удаа сонгогдсон, хувийн хэвшил ба төр хоорондын харилцаа, менежментийг сайжруулахад хамгийн сайн нэр дэвшигч гэж үзсэнээр Удирдах зөвлөл дэмжлээ. 
3. Хууль зүй, дотоод хэргийн сайдаар өмнө нь Хууль зүй, дотоод хэргийн дэд сайдаар ажиллаж байсан Б.Энхбаяр гишүүнийг нэр дэвшүүлж, Удирдах зөвлөл 100 хувь дэмжлээ" гэв.

Ингэснээр Х.Нямбаатар нь УИХ-ын гишүүн болон Хууль зүй, дотоод хэргийн сайдын албан тушаалаа өгөхөөр болж байна. Энэ нь хувь хүний хүсэл зорилгод түшиглэсэн гэхээс илүү улс төрийн шийдвэр, томоохон үүрэг даалгавар авч ажиллахаар болж буй хэрэг хэмээн МАН-ын Ерөнхий нарийн бичгийн дарга А.Ариунзаяа тайлбарлалаа. Хуулийн дагуу дараагийн сонгууль хүртэл нэг жилийн хугацаанд нөхөн сонгууль хийх боломжгүй тул УИХ-ын гишүүн Х.Нямбаатарын сонгогдсон тойрог эзэнгүй үлдэхээр болж байна. 

Түүнийг хотын даргад томилох үйл явц цаашид нийслэл дээр өрнөх бол хоёр сайдын томилгооны талаар Ерөнхийлөгчид эхлэн танилцуулан зөвшилцөж, дараа нь УИХ-д танилцуулах юм байна.