СТАТИСТИК: 330 сумын 36 нь эмэгтэй Засаг даргатай

Гэрэл зургийг MPA агентлагийн онцгой зөвшөөрөлтэйгөөр ашиглав

Өнөөдөр бол Олон улсын эмэгтэйчүүдийн эрхийг хамгаалах өдөр.

Эмэгтэйчүүдийн эрхийг хамгаалж, нийгэмд тэгш оролцоотой байхыг уриалдаг энэхүү тэмдэглэлт өдөрт зориулан монгол эмэгтэйчүүдийн удирдах албан тушаалд ажиллаж буй тухай статистик мэдээллийг хүргэж байна.

Манай улсын нийт хүн амын 50.7 хувь нь эмэгтэйчүүд. Эмэгтэйчүүдийн хөдөлмөр эрхлэлтийг харвал 2022 оны дөрөвдүгээр улирлын байдлаар 37.2% нь аж ахуйн нэгж байгууллагын удирдах албан тушаалд ажиллаж байна.

Улсын хэмжээнд 36 сум эмэгтэй засаг даргатай 

График. Эмэгтэй Засаг дарга нарын тоо(Аймаг бүрийн нэр дээр дарж, сумын эмэгтэй засаг дарга хэчнээн байгааг харах боломжтой)

Монгол Улс 21 аймаг, есөн дүүрэг, 330 сумтай. Түүхэндээ анх удаа аймгийн Засаг даргаар эмэгтэй хүн томилогдсон нь Ховд аймгийн Засаг дарга Э.Болормаа байв. 

Тэгвэл есөн дүүргээс ганц эмэгтэй нь Сүхбаатар дүүргийн Засаг дарга Х.Болормаа юм. Тэрбээр 2016 оноос хойш эл албан тушаалыг хашиж яваа нэгэн. 

Улсын хэмжээнд 330 сумын 36 нь эмэгтэй Засаг даргаар удирдуулж, үйл ажиллагаагаа явуулж байна. Үүнийг эх олонлогтой нь харьцуулахад ердөө 10 хувийг л эзэлж байгаа юм. 

Баянхонгор, Дархан-Уул, Орхон аймгийн сумдад эмэгтэй Засаг дарга байдаггүй аж.

Сүүлийн 30 жил давхардсан тоогоор 63 эмэгтэй УИХ-д сонгогдон ажиллаж байна

Төрийн эрх барих дээд байгууллагад сүүлийн 30 жилийн хугацаанд давхардсан тоогоор 63 эмэгтэй УИХ-д ард түмний төлөөлөл болж ажилласан байна. 2020 оны УИХ-ын сонгуулиар сонгогдсон 13 гишүүнээс Б.Баярсайхан, М.Оюунчимэг, Д.Сарангэрэл, Б.Жаргалмаа, Г.Мөнхцэцэг нар нь сэтгүүлч мэргэжилтэй юм. 

Өнөөдрийн байдлаар парламентын танхимын гишүүдийн 18 хувийг эмэгтэй гишүүн бүрдүүлж байгаа нь сайшаалтай. 

Гурван эмэгтэй гишүүн байнгын хороо даргалдаг

УИХ-ын дэргэд 11 Байнгын хороо үйл ажиллагаа явуулдаг бөгөөд гурвыг нь эмэгтэй гишүүн ахалдаг. Өмнө нь ганц М.Оюунчимэг гишүүн Нийгмийн бодлогын байнгын хорооны даргын үүргийг гүйцэтгэдэг байв. 

Өөрөөр хэлбэл, Байнгын хорооны дарга нарын 27.2 хувийг эмэгтэйчүүд бүрдүүлж байна. 

Тухайлбал:

• Байгаль орчин, хүнс, хөдөө аж ахуйн байнгын хорооны даргаар УИХ-ын гишүүн Б.Саранчимэг 
• Боловсрол,соёл, шинжлэх ухаан, спортын байнгын хорооны даргаар УИХ-ын Г.Мөнхцэцэг 
• Нийгмийн бодлогын байнгын хорооны даргаар УИХ-ын гишүүн П.Анужин тус тус ажиллаж буй. 

ТОП-100 аж ахуйн нэгжийн 24 нь эмэгтэй удирдлагатай 

 

Гэрэл зургийг MPA агентлагийн онцгой зөвшөөрөлтэйгөөр ашиглав

Монгол Улсын эдийн засагт үнэтэй хувь нэмрээ оруулж буй ТОП-100 аж ахуйн нэгжийг Засгийн газар, МҮХАҮТ-аас жил бүр танилцуулдаг. Тэгвэл эдгээр аж ахуйн нэгжийн 24 нь эмэгтэй удирдлагатай аж.

Монгол Улсын 2021 оны ТОП-100 ААН ба онцлох үзүүлэлтүүдтэй ЭНД дарж танилцана уу. 

Эмэгтэй сайд гурав, дэд сайд хоёр байна

Энэ удаагийн Засгийн газар өнөөдрийн байдлаар 16 яам, 49 агентлагтай.

Жендэрийн Үндэсний Хорооны мэдээлж буйгаар гурван эмэгтэй сайд, хоёр эмэгтэй дэд сайд байна. 

Гэвч сайд болон дэд сайдын албан тушаалын тухайд тус хуулийн хэрэгжилт хангагдаагүй байна.  

Бодит байдал дээр уг хуулийн хэрэгжилт хангагдаагүй байна. Тодруулбал манай улсад төрийн нарийн бичгийн даргын албан тушаалтай 15 эрэгтэй, нэг эмэгтэй ажиллаж байна. Мөн агентлагийн даргын албан тушаалтай 21 эрэгтэй, гурван эмэгтэй байдаг.

Мөн агентлаг дахь хэлтэс албаны 148 эмэгтэй дарга байгааг Жендэрийн Үндэсний хорооноос мэдээлсэн юм. 

Бэлтгэсэн сэтгүүлч: Э.Намуунцэцэг, Б.Даваабазар