"JENESYS 2022" хөтөлбөрт оролцогч хүүхэд, залуус Япон улсыг зорилоо

Япон орны талаарх ойлголтыг нэмэгдүүлэх солилцооны хөтөлбөр "JENESYS 2022"-ийн оролцогчдыг үдэх арга хэмжээ өчигдөр Монгол-Японы Хүний Нөөцийн Хөгжлийн төвд боллоо.

Тус улсын Гадаад харилцааны яамнаас жил бүр зохион байгуулдаг тус хөтөлбөр нь Япон, Монгол хоёр орны харилцааны ирээдүйг залгамжлан, мэдээллийг идэвхтэй түгээх чадвартай залуучуудыг Японд урин ойлголтыг нь нэмэгдүүлэх зорилготой юм.

Энэ удаагийн хөтөлбөрт Монголын 40 хүүхэд, залуус оролцож байгаа бөгөөд тэд арванхоёрдугаар сарын 6-13-нд Японд зочилж, шинжлэх ухаан, технологи, тус улсын уламжлалт соёлоос суралцахаас гадна айлд зочилно.

 

Японы Элчин сайдын яамны Дэд тэргүүн Ш.Кикүма залуусыг үдэж өгөхдөө “Шинэ төрлийн коронавирусийн халдварын улмаас өнгөрсөн жил хүртэл цахимаар зохион байгуулагдаж байсан хэдий ч Япон Улс, Монгол Улсын хооронд дипломат харилцаа тогтоосны 50 жилийн ой, "Япон, Монголын хүүхэд залуучуудын найрамдал, солилцооны жил" хэмээх тэмдэглэлт ойн энэ жил Монголын 40 хүүхэд, залуус Япон руу явах гэж байгаад баяртай байна.

Японд их зүйлийг сурч, үзэж харснаа гэр бүл, найз нөхөдтэйгөө хуваалцаарай” хэмээн захилаа.

 

Хөтөлбөрт оролцогч залуусын төлөөлөл, МУИС-ийн оюутан М.Халиун "Өнгөрсөн жил би Япон хэлний илтгэлийн тэмцээнд оролцож, түрүүлсэн тул JENESYS хөтөлбөрт оролцох эрхээр шагнуулан ийнхүү Япон улс руу явахаар болоод байна. Миний хувьд, дунд сургуульд байхаасаа эхлэн Япон соёлыг сонирхож, япон хэл сурч эхэлсэн бөгөөд тус улсад очиж үзэхийг маш их хүсдэг байсан.

Тиймээс надад JENESYS хөтөлбөрөөр дамжуулан японы соёлыг өөрийн биеэр очиж, үзэх боломж олдсонд баяртай байна. Японд өнгөрүүлэх цаг хугацаа гайхалтай байна гэдэгт итгэлтэй байна" хэмээн сэтгэгдлээ хуваалцлаа.

Ташрамд дурдахад, Япон улсын "Найрамдалт харилцааны хөтөлбөр"-ийг тус улсын Гадаад харилцааны яамнаас Ази-Номхон далайн орнууд, Хойд Америк, Европ, Латин Америк, Карибын тэнгисийн орнууд хоорондын ард иргэдийн найрамдалт харилцааг өргөжүүлэн дэмжих зорилгоор анх эхлүүлж байжээ.

Харин одоогоор тус хөтөлбөрийн хүрээнд Ази-Номхон далайн орнууд, Хойд Америк, Европ, Латин Америк, Карибын тэнгисийн орнуудаас жилд дунджаар 2,700 хүнийг Япон улс хүлээн авч байгаа аж.

Тус хөтөлбөрт Монголоос жил бүр 80-120 хүүхэд, залуус хамрагддаг ч сүүлийн хоёр жил цар тахлын улмаас түр хойшлоод байсан юм.