Гэрэл зургийг MPA агентлагийн онцгой зөвшөөрөлтэйгөөр ашиглав

Өрх толгойлсон ээжүүд Гэр бүлийн тухай хуулийн шинэчилсэн найруулгыг батлахыг шаардаж, УИХ-ын эмэгтэй гишүүдэд шаардлага хүргүүллээ. 

Иргэн Д.Баянбат "11 жил гацсан Гэр бүлийн тухай хуулийг шинэчилж, сайжруулж өгөөч гэж хүсэж байна. Бид шаардлагаа дахин дахин хүргүүлсээр байх болно. 

Манай улсад өрх толгойлсон эмэгтэйчүүд 80 мянга, эрэгтэйчүүд 20 мянга байна. Эрэгтэйчүүд үргэлж эмэгтэйчүүдийг хохироодоггүй. Эмэгтэйчүүдийн хүчирхийлэл ч бас байдаг. Гэр бүл салалтад нөлөөлдөг зөрчлийн хуулиуд бий" гэдгийг хэлэв. 

Хүүхэд асран хамгаалах эрх, үүргийн талаар гэрээ байгуулдаг болохыг шаардаж байна

 

Гэрэл зургийг MPA агентлагийн онцгой зөвшөөрөлтэйгөөр ашиглав

Иргэн А.Бүрэнтөгс "Гэр бүлийн тухай хууль 1999 онд батлагдсанаас хойш хоёр удаа нэмэлт өөрчлөлт орсон. Одоогийн хэрэгжиж буй хууль хүүхдүүд болон өрх толгойлсон ээж, аавуудын эрхийг зөрчиж байна. Хүүхдийн тэтгэлэг төлдөг 4,000 гаруй аав, ээж байдгаас 1/3 нь тэтгэлгээ төлдөг. Бараа бүтээгдэхүүний үнэ өссөн үед тэтгэлгийн мөнгө хэрэгцээнд хүрэлцэхгүй байгаа нь хүүхдийн эрхийг ноцтой зөрчиж байна. 

Иймээс төрийн гурван өндөрлөг, УИХ-ын эмэгтэй гишүүдэд дараах зургаан шаардлагыг хүргүүлж, Гэр бүлийн тухай хуулийн шинэчилсэн найруулгыг яаралтайгаар УИХ-аар хэлэлцэхийг хүсэж байна. 

1. Энэ оны тавдугаар сард эмэгтэй гишүүдийн санаачилсан орлого өндөртэй бол түүний 50 хувиар, багатай бол амьжиргааны баталгаажих төвшнөөр хүүхдийн тэтгэлгийг нас харгалзахгүй тогтоох, 
2. Гэр бүл салахад нөлөөлсөн буруутныг тогтоож, хариуцлага тооцдог болох,
3. Хосууд гэрлэлтээ цуцлуулаагүй ч хоёр талд амьдарч байсан хугацаандаа гэрлэлт цуцлуулсны дараа нөхөн төлбөрийн тэтгэлгийг нөхөж олгох,
4. Эхнэр болон нөхрийн аль нэг нь гадаад руу гарч ажиллахаар болсон бол гэрлэлтийн гэрээ байгуулж, тэндээ очоод алга болбол Элчин сайдын яамаар дамжуулан хүүхдийн тэтгэлгийг гаргуулдаг болох,
5. Гэр бүл салахад эцэг эхийн эрх үүргийг хариуцлагатай болгож, хүүхэд асран хамгаалах эрх, үүргийн талаар гэрээ байгуулдаг болох,
6. Өрх толгойлсон ээжүүдийн төлөөллийг Гэр бүлийн тухай хуулийн шинэчилсэн найруулгын төслийн ажлын хэсэгт оролцуулж, ажиллуулахыг шаардаж байна.

Эдгээр шаардлагыг хүлээн авч, УИХ-ын намрын чуулганаар эхний асуудлаар хэлэлцэж өгөөч. Шаардлагыг хүлээж авахгүй бол бид дараагийн арга хэмжээг авах болно" гэлээ.