О.Амгаланбаатар: "Алтайн залуус" чуулга уулзалт Говь-Алтай аймгийн гэр бүлгүй залуучуудыг танилцуулах зорилготой

Гэрэл зургийг MPA агентлагийн онцгой зөвшөөрөлтэйгөөр ашиглав

2022 оны наймдугаар сарын 12-14-ний өдрүүдэд Говь-Алтай аймгийн төвд "Алтайн залуус" чуулганыг зохион байгуулах гэж байна. 

Энэ талаар Говь-Алтай аймгийн Засаг дарга О.Амгаланбаатар "Аймгийнхаа 86 багаар явж, иргэдийн санал бодлыг сонслоо. Говь-Алтай аймгийн хувьд сүүлийн 30 жилд хүнээ огт бодоогүй байна. Малчны хотонд очоод эмчийн үзлэг хийхэд 20-30 насны залуучууд цусны даралт ихсэх өвчинтэй, эмнэлгийн үйлчилгээ удаан хугацаагаар аваагүй байх жишээтэй.

Залуучуудын дунд цусны даралт ихсэх өвчин их байна. Үүнээс гадна хоол боловсруулах эрхтний хорт хавдар зэрэг суурь өвчнүүд ихээр илэрч байна. Тиймээс эрүүл мэндийн тусламж, үйлчилгээг тогтмолжуулах арга хэмжээ авч эхэллээ.

Манай аймгийн хувьд эрүүл мэндээс гадна гэр бүл төлөвлөлтийн асуудал орхигджээ. Хөдөө багт очоод уулзалт хийхэд ахимаг насны хүмүүс ирж байна. Нөгөө талдаа 20-40 насны залуучууд ирж байгаагаас эмэгтэй хүн цөөхөн. Уулзалтад 10 залуу ирлээ гэхэд 1-2 нь эмэгтэй. Үүнээс харахад хөдөө орон нутагт залуусын хүйсийн харьцаа алдагдчихсан.

Иргэд, малчдын санал хүсэлтийг сонсоход залуучууд хоорондоо танилцах, уулзах арга хэмжээг зохион байгуулж өгөх санал тавьдаг. Ийм арга хэмжээ зохион байгуулахгүй бол залуучууд түгжигдчихсэн байдалтай байна гэдэг.

Энэ дагуу бид "Алтайн залуус" чуулга уулзалтыг зохион байгуулж, Говь-Алтай аймгийн хэмжээний гэр бүлгүй залуучуудыг хооронд нь уулзуулж, танилцуулах зорилготой байгаа. Манай аймагт цус ойртолтын асуудал хүндрэлтэй. Цус ойртолтоор хамгийн өндөр түвшинд Говь-Алтай аймаг байгаа тухай мэдээллийг интернэтээс хайхад гарч ирнэ. Тийм учраас сум, сумын залуучуудыг уулзалдуулж, танилцуулах зорилгоор уг арга хэмжээг хийнэ.

Өнөөдрийн байдлаар уг чуулганд 300 орчим залуу оролцохоор бүртгүүлжээ. Чуулганд ирсэн бүх хүнийг бүх төрлийн нарийн мэргэжлийн эмчийн үзлэгт хамруулаад, шаардлагатай зөвлөгөөг өгнө.

Гэр бүл төлөвлөлт, мал аж ахуйн болон хувийн бизнесээ хэрхэн авч явах талаар мэргэжлийн засагчид зөвлөгөө өгч, сургалт орно.

Түүнчлэн хүн байхын мөн чанар, үнэт зүйлс, ургийн бичиг хөтлөх, нөхөн үржихүй, цус ойртолтын талаар сургалтууд явагдана" хэмээн өчигдөр хэвлэлийн хурал зарлан мэдээлснийг Говь-Алтай аймгийн Засаг даргын Тамгын газрын албан ёсны фэйсбүүк хуудаст нийтэлжээ.