Г.Гэрэлмаа: Цагдаа нар над дээр гишгэсэн. Чаддаг юм бол иргэдээ дуудаач, чамайг хамгаалах хэн ч байхгүй гэсэн
Цагдаагийн алба хаагчид сэтгүүлчийн биед халдаж, зургаан цаг баривчлан саатуулсан талаар бид мэдээлсэн.
Тэгвэл энэ талаар тухайн сэтгүүлч Г.Гэрэлмаа олон нийтэд мэдээлэл өглөө.
Тэрбээр "Өчигдөр цагдаа нар намайг Зайсангаас баривчлан, цагдаагийн хэлтэст аваачсан. Миний бүх юмыг хураагаад ямар ч хүнтэй харилцах боломжгүй, хүнд байдалд оруулсан. Утас хурааж авсан учраас эмнэлгийн тусламж авч, өмгөөлөгчтэй ярих боломжгүй байсан.
Би ажлаа гүйцэтгэж явсан. Мэдээллийн лайвыг шууд дамжуулж байтал цагдаа нар "Лайваа зогсоо. Үгүй бол чамайг ачна" гэж гэсэн. Камер, модем булааж авсан. Камер, утас, микрофоныг шидэлцээд өгөхгүй байсан. Намайг "Та согтуу, хууль бусаар бичлэг хийсэн" гэсэн. Ингээд зогсохгүй хүнгүй газар биед халдсан. Би тусламж гуйж зөндөө орилсон боловч хэн ч байгаагүй. Миний амыг гараараа таглаад "Чаддаг юм бол хашхир. Чамайг хэн ч сонсохгүй" гэсэн. Олон удаа цохиулсан. Нэг мэдэхэд хацраараа фургоны шалан дээр унасан. Маш олон цагдаа намайг дээрээс дарсан, гишгэсэн. Яагаад ингэснийг ойлгоогүй. Зургаан цаг хэнтэй ч утсаар яриулаагүй. Хүнд байдалд оруулсанд гомдож байна. Надаас яагаад тайлбар мэдүүлэг авахгүй байгаа юм бэ гэхэд хэн ч авахгүй, чаддаг юм бол иргэдээ дуудаач, чамайг хамгаалах хэн ч байхгүй, хэвлэлийнхнийгээ дуудаач гэж харьцсан" гэлээ.
Энэ явдал Хан-Уул дүүргийн 1 дүгээр хэлтэст болсон байна. Өнөөдөр нийслэлийн Цагдаагийн газраас мэдээлэл өгсөн ч сэтгүүлчтэй хэн нэгэн цагдаа холбогдоогүйг тэрбээр хэллээ. Мөн тэрбээр "Сая би цагдаа дээр очоод гомдол мэдүүлэг өгмөөр байна гэхэд "Чи гомдол гаргаж яах гээд байгаа юм" гэж Мөрдөн байцаах хэлтсийн дарга Баттөмөр нь өрөөндөө оруулж загнаад гаргасан. Би Эрдэнэбаатар гэдэг байцаагчид мэдүүлэг гаргах гээд өмгөөлөгчтэйгөө явж байгаа" гэв.
Түүнийг ачиж явсан машинаас буулгаад Цагдаагийн байр руу оруулаад драгер үлээлгээд "0" гарсан ба зураг нь байгаа гэдгийг сэтгүүлч хэллээ. 10 гаруй жил сэтгүүлчээр ажиллахдаа өнгөрсөн удаа ийм тохиолдол мөн гарч байжээ. "Тухайн үед би дөрвөн том биетэй цагдааг зодсон болоод хэрэг хаагдсан. Мэргэжлийн ажлаа хийгээд явж байхад баримтаа устгуулаад камераа хураалгаж байна. Миний утсанд олон баримт байхад би утсандаа нэгжлэг хийлгэсэн. Иймээс цагдаа, хууль хяналтын байгууллага хэвлэлийн эрхэд халдаж байна" гэдгийг тэрбээр хэлээд гэмтлийн зэрэг тогтоолгохоор шүүх шинжилгээний эмнэлэгт хандахаа илэрхийллээ.
З.Боргилмаа: Дамжуулсан мэдээллийг устгана гэдэг сэтгүүл зүйн агуулгад хүчний байгууллагад халдсан хэрэг
МСНЭ-ийн Ерөнхийлөгчийн үүргийг түр орлон гүйцэтгэгч З.Боргилмаа энэ үеэр мөн байр сууриа илэрхийллээ.
"Сэтгүүлчийн мэргэжлийн хууль ёсны үйл ажиллагаанд цагдаагийн алба хаагчид биед нь хүчээр халдаж, баримтыг устгаж байгаа энэ явдал бол анхны тохиолдол биш. Жилийн өмнө яг энэ асуудлаар цагдаагийн алба хаагч мэргэжлийн үйл ажиллагааг таслан зогсоож биед нь халдсан асуудлаар бид ЦЕГ, Хууль зүй, дотоод хэргийн сайд Х.Нямбаатарт хандаж байсан.
Өчигдрийн тухайд сэтгүүлчийг сурвалжилга хийж байсан газраас хүч хэрэглэж холдуулаад мэдээлэл дамжуулж байсан төхөөрөмжийг таслан зогсоогоод бүх хэрэгслийг хурааж авсан. Оператор мөн байгаа. Гар утсыг аваад удаан хугацаагаар аваад үзэгчдэд хүргэж байсан, цацагдсан мэдээллийг устгасан байна.
Хэвлэл мэдээллийн эрх чөлөөний тухай хуулиар сэтгүүлчийн нийтэлж нэвтрүүлж байгаа мэдээллийн агуулгад хяналт тавихыг хориглосон байдаг. Дамжуулсан мэдээллийг устгана гэдэг сэтгүүл зүйн агуулгад хүчний байгууллагад халдсан хэрэг. Хэвлэлийн эрх чөлөөг хамгаалах Эрүүгийн хуулийн заалт байдаг. Өөрийн болон бусдын ашиг сонирхлыг хөндсөн мэдээллийг тараалгахгүй байхын тулд хүч хэрэглэхээр завдах нь эрүүгийн гэмт хэрэг юм гэж хуульд заасан байна. Энэ хоёр хуулийг зөрчиж дур зоргоор ийм үйлдэл хийсэн байна.
Хэвлэн нийтлэх эрх чөлөө гэдэг Үндсэн хуулиар тунхаглагдсан эрх чөлөө байдаг. Үүнийг хэв журам сахиулах үүрэгтэй цагдаагийн алба хаагчид дур зоргоороо хөндөж, халдаж болдоггүй юм. Энэ нь хэвлэл мэдээлэл, цаашлаад иргэд төрийн хооронд маш том зөрчлийг үүсгээд байна. Нэг биш удаагийн үйл явдал биш учраас Цагдаагийн Ерөнхий газрын удирдлагууд дүгнэлт хийх болсон. Бодитой хариу өгөхийг шаардаж байна" гэлээ.
