ФОТО: УИХ-ын намрын ээлжит чуулганы нээлтийн ирц 74.3 хувьтай байв
УИХ-ын намрын ээлжит чуулган өнөөдөр нээлтээ хийлээ. УИХ-ын дарга Г.Занданшатар чуулганыг нээж үг хэлсэн юм.
Тэрбээр "УИХ-ын 74 гишүүнээс тав нь өвчтэй байна. Ирвэл зохих 69 гишүүнээс 54 нь ирснээр чуулганы ирц 74.3 хувь болж нээлтээ хийж байна. Өнөөдрөөс эхлээд УИХ-ын гишүүд түргэвчилсэн шинжилгээ өгч, танхимаар хуралдана.
2021 оны улсын төсвийг хэлэлцэж батлахаас эхлээд нэн чухал олон асуудлууд бий. Суругуулийн орчинд халдварын голомт тархахаас сэргийлэх, ялангуяа агааржуулалтыг тогтмол хийх, нийтийг хамарсан арга хэмжээг зөв менежментээр зохион байгуулах шаардлагатай.
Өнгөрсөн хугацаанд УИХ-аас баталсан 400 гаруй хуульд хүний эрхийн үүднээс дүгнэлт хийх ажлыг УИХ-ын Тамгын газрын дэргэдэх судалгааны хүрээлэн, ХЭЗК-той хамтран эхлүүлээд байна. Үе шаттай хийгдэх энэхүү цогц ажил нь УИХ-ын ажлыг дүгнэх нэг үзүүлэлт байх болно. Энэ удаагийн чуулган Монгол Улсын эдийн засгийн шинэ сэргэлтийг тодорхойлсон чуулган болно.
Байнга хувьсан өөрчлөгдөж, шинэ шинэ бэрхшээл учруулж байгаа цар тахлыг зөвхөн хорио хязгаарлалтаар бус, харин иргэн бүрийн хариуцлага, төр засгийн манлайлал, хамтын хүчээр давж гарна. Ингэхдээ хааж түгжихийг урьтал болгохгүйгээр хувь хүн, байгууллагын сахилга хариуцлагад тулгуурлаж, үүссэн нөхцөл байдалд дасан зохицож амьдрах шаардлагатай боллоо. Дэлхийн нийтийн хандлага ч ийм байна" гэлээ.
Гэрэл зургийг mpa.mn
Фото
