The Wasabies: Шинэ бүрэлдэхүүнээрээ "Girlfriend" дуугаа цацахад анхны уран бүтээлээ гаргасан үеийнх шигээ сандарсан

The Wasabies

"Боловсрол" телевизээс зохион байгуулсан "Оддын академи" шоунаас төрөн гарсан охидын “The Wasabies” /Васабис/ хамтлаг хоёр шинэ гишүүнтэйгээр уран бүтээлээ үргэлжлүүлж эхлээд буй. 

Иймд хамтлагийн шинэ уран бүтээл, цаашдын зорилгын талаар ярилцлаа. 

- Бүгдэд нь өдрийн мэнд хүргэе. "Васабис" хамтлаг одоо ямар төсөл дээр ажиллаж байгаа вэ? 

- Багийн ахлагч Buika: "Васабис" хамтлаг анх 2018 онд таван хүний бүрэлдэхүүнтэйгээр байгуулагдсан. Одоо дөрвөн гишүүний бүрэлдэхүүнтэйгээр "Butterflies" нэртэй гурав дахь төсөл дээрээ ажиллаж байна. Саяхан хоёр гишүүн маань хүндэтгэх шалтгааны улмаас өөрсдийнхөө сонголтоор хамтлагаасаа гараад, хоёр шинэ гишүүнтэй болсон. 

- Шинэ хоёр гишүүний хувьд өөрсдийгөө товчхон танилцуулахгүй юу? 

 

Гэрэл зургийг MPA.mn /WINDY/

Windy: Намайг Винди гэдэг. Би багаасаа дуулах дуртай хүүхэд байсан учраас дуучин болохыг хүсдэг байсан. Тэгээд СУИС-ийг жүжигчнээр төгссөн. Миний амьдрал одоо тэр чигтээ урлагтай холбогдсон гэж хэлж болно. "Васабис" хамтлаг бол миний урлагийн амьдралын гарааг тавьж өгч буй том талбар болж байна. 

 

Гэрэл зургийг MPA.mn /JASMINE/

Jasmine: Харин намайг Жасмин гэдэг. Би ч мөн адил багаасаа урлагтай холбоотой өссөн. Гэхдээ дууг хоббигоороо л дуулдаг байсан болохоос биш албан ёсны хамтлаг, лэбэлд хамааралтай явж үзээгүй. Анх удаа лэбэлтэй хамтарч ажиллаж байгаа учраас сэтгэл маш өндөр байна. Нөгөө талдаа их хариуцлагатай байхыг хүсэж байна. 

- Олны танил байна гэдэг нэг бодлын гоё ч нөгөө талаар маш хэцүү байх. Та бүхний хувьд энэ байдлыг хэрхэн мэдэрч байгаа вэ? 

- Buika: "Васабис" хамтлаг байгуулагдаад анхны уран бүтээлээ цацах үед хүмүүс яаж хүлээж авах бол гээд маш их сандрал, түгшүүртэй байсан. Бидний зүгээс ч бас энгийн нэгэн хамтлаг байхыг хүсээгүй тул их өнгөлөг гарч ирсэн л дээ. Тэгсэн чинь хүмүүс Кпоп-ыг дуурайлаа гэх зэргээр сөрөг сэтгэгдэл их бичиж байсан юм. Харин дараа дараагийн уран бүтээлээ цацаад явахад  "Васабис" гэх хамтлагийн өнгө төрх нь энэ юм байна гээд ойлгож, сайнаар хүлээж авч эхэлсэн.

Сая сүүлд шинэ бүрэлдэхүүнээрээ "Girlfriend" уран бүтээлээ цацахад бас анх дэбют хийж байсан үеийн мэдрэмж төрсөн. /Инээв/ Манай шинэ гишүүдийг хэрхэн хүлээж авах бол, хамтлагийг маань яаж харах бол гээд... Гайхалтай нь сонсогчид маань шинэ гишүүдийг эергээр хүлээж авсанд хувьдаа баяртай байгаа. 

Jasmine: Тийм шүү, маш их айж байсан. Гэтэл ихэнх нь эергээр хүлээн авч, бидэнд амжилт хүссэнд баярлаж байна. Энэ нь цаашдын уран бүтээлүүдээ илүү сайн хийх эрч хүчийг бэлэглэсэн. Windy бид хоёрын хувьд олон нийтэд аль хэдийнэ танигдчихсан хамтлагт орсон учраас илүү шахуу ажиллаж байгаа. Энэ хамтлагийг гаднаас нь л хардаг байж байгаад дотор нь орсон чинь төсөөлснөөс ч их завгүй, шахуу бэлтгэлтэй ажилладаг юм билээ. Үнэхээр их хүч хөдөлмөр гаргаж, хариуцлагатай байх ёстойг ойлгосон.

Buika: Энэ дууны үг, аяыг продюсер Б.Наранзун ах бичсэн. Өмнө нь бид бас нэг төслийнхөө хүрээнд бүх уран бүтээлээ бэлдэж цомгоо гаргах гэж байсан боловч цар тахлын улмаас саатан ороод цацаж чадаагүй.

- Нийт хэдэн уран бүтээл гаргасан байгаа вэ?

 Buika: Бид урт настай уран бүтээл хийхийг хүсдэг. Байгуулагдсанаасаа хойш гэхээр нийт 14 уран бүтээл гаргасан. Ингэхдээ бүгдийг нь дүрсжүүлж цацсан.

- Танай хамтлагийн бусад хамтлагаас ялгарах онцлог юу бол?

Buika: Манай хамтлаг анхнаасаа ганцхан дуулах бус дуулаад, бүжиглэдэг хамтлаг байхыг зорьж ажилласан. Pop R&B урсгалаар өөрсдийн онцлог өнгө төрхийг бүрдүүлэхээр явж байгаа учраас төрөл бүрийн жанарын уран бүтээл гаргахыг манай продюсер зорьдог. Бид ч бас үүнтэй санал нэгддэг. Дээрээс нь манай хамтлаг Leto Music лэбэлд харьяалагддаг. Өөрөөр хэлбэл, дөрвөн охин нийлээд дураараа уран бүтээл хийдэггүй. 

 

Гэрэл зургийг MPA.mn /ANUKA/

Anuka: Сайн байна уу, хамтлагийн гишүүн Ануужин байна. Миний хувьд "Оддын академи" шоунд оролцож, хамтлаг анх байгуулагдсан цагаас эхлэн хамт байгаа. Цаашдаа ч илүү сайн уран бүтээлүүд гаргахын төлөө багийнхантайгаа явах болно. Урлагийг би өөрийнхөө амьдралд бүр мөсөн оруулсан учир "Васабис" хамтлаг миний хувьд амьдралын нэгээхэн хэсэг гэж боддог. Хамтлагийн гишүүд бүгд ижилхэн бүжиглэж, дуулах тэгш эрхтэй учраас онцлох үүрэг хүлээдэггүй онцлогтой. 

- Сүүлийн үед артистууд гаднын зах зээлд гарах сонирхолтой болсон. Танай хамтлагийн алсын зорилгод энэ сонирхол бас байгаа байх тийм үү? 

Buika: Анх байгуулагдсан цагаас л Азийн зах зээлд цахимаар дамжуулан уран бүтээлээ болон улсаа сурталчлах зорилготой байсан. Тэр зорилгынхоо хүрээнд одоо ч ажиллаж байна. Хамтлагийн хувьд гаднын зах зээлд гарах амбиц бий. Бидэнд БНХАУ болон Япон улсаас санал ирж байсан ч манай лэбэлийн зарчимтай нийлэх санал байгаагүй учраас хамтарч ажиллаагүй.

- Өдөрт хэдэн цагийг бэлтгэл, уран бүтээлдээ зарцуулж байна вэ?

 

Гэрэл зургийг MPA.mn /Зүүн гар талаас BUIKA, WINDY, JASMINE, ANUKA/

Jasmine: Бүтэн өдрийг зарцуулдаг гэхэд болно. Дараагийн уран бүтээлээ гаргахаар ажиллаж учраас хоолойны бичлэгтээ ороод, их шахуу хуваарьтай яваа. Уран бүтээлийнхээ хажуугаар хэлний бэлтгэлд явж, боловсролдоо цаг зарцуулдаг.

Windy: Өмнө нь би дуу бүтэх үйл явцыг амархнаар бодож явсан. Гэтэл нэг дуу гарахад ард нь маш олон хүн ажиллаж, хөдөлмөрлөж байж уран бүтээл төрдгийг ойлгож байна.

 

Гэрэл зургийг MPA.mn /BUIKA/

- Боловсролдоо цаг зарцуулдаг гэж ярилаа. Боловсрол гэдгийг хэрхэн ойлгодог тухай үзэл бодлоо хуваалцахгүй юу?

Buika: Шинээр олж мэдэж буй бүх зүйлийг боловсрол гэж боддог. Бидний зарим нь их сургуульдаа суралцаж, зарим нь төгссөн. Тэгэхээр өөрийгөө хөгжүүлэх гэж хийж буй бүх зүйлээ сайн хийвэл эргээд үр дүнгээ өгөх байх. Манай хамтлагийн хувьд олон улсын зах зэлд гарахыг зорьж байгаа учраас нэн түрүүнд гадаад хэлний боловсролдоо илүү анхаарч байна.

- Ярилцсанд баярлалаа, уран бүтээлд нь амжилт хүсье.

 “The Wasabies” хамтлагийн зургийн цомгоос: 

 

The Wasabies

 

The Wasabies

 

The Wasabies

 

The Wasabies

 

The Wasabies

 

The Wasabies