Байгууллагын албан бичгийг үндэслэж шинээр QR код олгоно

Гэрэл зургийг mpa.mn

Бүх нийтийн бэлэн байдлын зэрэгт шилжиж буйтай холбогдуулан хэрэгжүүлэх арга хэмжээний талаар мэдээлэл хийх үеэр QR кодтой холбоотой асуудлаар холбогдох албаныхан мэдээлэл өглөө. 

Нийслэлийн Засаг даргын орлогч Ж.Сандагсүрэн "Хоёр төрлийн QR код ирж байгаа. Иргэд очсон байгууллага болгон дээрээ ибаримт аппликэйшн суулгаад хаана очсон гэдгээ бүртгүүлдэг нэг асуудал байгаа. Энэ бол иргэнд зориулсан иргэний бүртгэлийн QR код юм.

Харин арванхоёрдугаар сарын 14-нийг хүртэлх хугацаанд 23,902 тээврийн хэрэгсэлд QR код олгосон. Хөл хорионы дэглэмийн үед зарим үйлдвэрлэлийн болон үйлчилгээний салбарыг хэсэгчлэн нээсэн. Энэ болгон дээр тухайн байгууллагын ажилтанд QR код олгож байсан. Тухайн хүмүүсийн QR код идэвхжихгүй. 

Зөвхөн арванхоёрдугаар сарын 14-нөөс өмнө QR код авсан 23,902 иргэний код маргааш идэвхжинэ. Шинээр хэвлэж машиндаа хадах юм. Нөхөж авах шаардлага мэдээж хэрэг үүснэ. Энэ журмын дагуу шинээр QR код авах байгууллагын албан бичгийг үндэслээд олгоно. Хоцорсон хүмүүс байгууллагын хүсэлтээр автомашины дугаараа өгөөд зөвшөөрөл авч болно. Ажиллаж байгаа байгууллагуудад ажилчдаа гэрээсээ ажиллуулаач гэсэн зөвлөмж өгч байгаа" гэлээ. 

Харин Нийслэлийн мэдээллийн технологийн газрын дарга О.Чинзориг "Хөл хориотой холбогдуулан тээврийн хэрэгслийн зорчих хөдөлгөөнийг хориглож байгаа. Ажиллах 15 байгууллагын тээврийн хэрэгслийг арванхоёрдугаар сарын 1-н хүртэл бүртгэсэн. Энэ мэдээлэл smartcar.mn сайтад бүртгэгдэж, 23,900 тээврийн хэрэгслийн QR код идэвхжээд байгаа. Иргэд тээврийн хэрэгслийн дугаараар хэвлэж авахаар өмнөх QR кодоос өөр загвараар хэвлэгдэж байгаа" гэв. 

Иргэд QR код авах хүсэлтээ  nokshtab@ulaanbaatar.mn имэйл хаягаар ирүүлэх юм байна. 

Тээврийн хэрэгслийн жагсаалтад байгууллагын регистр, тээврийн хэрэгслийн марк, улсын дугаар, эзэмшигчийн нэр бүхий мэдээллийг багтаасан байх бөгөөд Нийслэлийн онцгой комиссын Шуурхай штабын дэргэдэх Замын хөдөлгөөн зохицуулалтын баг хүсэлтийг хүлээн авах аж. 

Байгууллага системд бүртгэгдэж, олгосон QR кодыг www.smartcar.mn цахим хуудаст хандан татаж авна. Хязгаарлалтад багтаагүй 15 үйл ажиллагааны чиглэлээс бусад байгууллагын хүсэлтийг хүлээн авахгүй, буцаана.   

1. Байгууллагын чиг үүргийг тодорхой бичих  
2. Байгууллагын регистрийн дугаарыг үнэн зөв бичих  
3. Байгууллагын нэрийг бичихдээ хашилт буюу “ тэмдэглэлийг ашиглахгүй байх  
4. Автомашины улсын дугаарыг бичихдээ зай авахгүй үргэлжлүүлж бичнэ
5. Microsoft Excel файлаар бэлтгэнэ 
6. Зөвшөөрлийн хуудсыг буцааж хүлээн авах  ажилтны албан тушаал,  нэр,  e-mail хаяг, утасны дугаарыг тодорхой бичих хэрэгтэй.