Эзэн Чингис хаан түүний залгамжлагч алтан ургийн суут хаан Хубилай сэцэн хааны мэндэлсэний 805 жилийн ой энэ онд тохиож байна.
Ойг тохиолдуулан Монголын Үндэсний музей, Мөнх тэнгэрийн цаг ТББ, Чингис хааны лаан баримлын музейтэй хамтран Хубилай хааны мэндэлсний 805 жилийн ойд зориулж, "Хубилай хаан ба Монгол жанжид" үзэсгэлэнг өчигдөр Монголын Үндэсний музейд нээгээд буй.
Энэ хүү тусгай үзэсгэлэн нь 2020 оны есдүгээр сарын 23-аас аравдугаар сарын 23-ны өдөр хүртэл олон нийтэд нээлттэй дэлгэгдэх аж.
Энэхүү үзэсгэлэнд Хубилай хаан, Монгол гүрний үеийн түүхэн хүмүүс, баатруудын дүр төрхийг сэргээн урласан сонирхолтой лаан баримлууд, Монголын Үндэсний музейн сан хөмрөг хадгалагддаг Юань гүрний үед холбогдох хосгүй үнэт үзмэрээ дээжлэн Эрхэм үзэгч танаа толилуулж байна.
Лаан баримал нь түүхэн бодит хүмүүсийн дүр төрх, нүүр царай, бие бялдарын онцлогийг шингээн бүтээдэг дүрслэх урлагийн өвөрмөц төрөл юм. Эдгээр лаан баримлууд нь Монгол гүрний үеийн түүхэн хүмүүсийн дүр төрх, хувцас, засал чимгийг сэргээн бүтээснээрээ хүүхэд залууст танин мэдэхүйн чухал ач холбогдолтой төдийгүй түүхэн агшинг өнөө цагт амилуулсан мэт бодит мэдрэмжийг төрүүлэхүйц сонирхолтой хэлбэрээр дэлгэгдсэн юм.
Түүхэн хүмүүсийг сэргээн амилуулсан уран бүтээлчийн бүтээл, түүхийн биет дурсгалуудыг нэгэн дороос үзэх таатай боломжийг таньд олгож байна.
/Гэрэл зургийг MPA.mn/