ФОТО: ӨМӨЗО-ны сургуулиудад хятад хэл, бичгээр хичээл заахыг эсэргүүцсэн иргэд цуглав

БНХАУ-д харьяалагддаг зарим үндэстэн, ястны ерөнхий боловсролын сургуулийн сургалтыг хятад хэл, бичгээр явуулах шийдвэр энэ жилээс хэрэгжиж эхэлж байгаа гэх мэдээлэл сошиалд тараад буй. Сургалтыг хятад хэл, бичгээр явуулснаар монгол бичгийг үгүй хийх гэж байна хэмээн эсэргүүцсэн Өвөрмонголчууд цуглаан зохион байгуулж, эсэргүүцлээ илэрхийлсэн бичиг барин, дуу хоолойгоо нэгтгэж буй зураг, бичлэг ч мөн сошиалд тараад байгаа юм. 

Харин өнөөдөр твиттер болон фэйсбүүкээр Өвөрмонголчуудын тэмцэл үр дүнд хүрсэн гэх мэдээлэл тарав. Энэ талаар Гадаад харилцааны яамны Консулын газраар дамжуулан Хөх хот дахь Консулын газраас тодруулах гэсэн боловч тодорхой мэдээлэл алга гэдэг хариулт өглөө. 

Мөн БНХАУ-аас Монгол Улсад суугаа Элчин сайдын яамны хэвлэл мэдээлэл хариуцсан ажилтантай утсаар холбогдон дээрх асуудлыг тодруулахад албан ёсны мэдээлэл ирээгүй тул хариулт өгөх боломжгүй гэв. 

Энэ үеэр Улаанбаатарт амьдардаг Өвөрмонгол иргэд болон “Босоо хөх Монгол” зэрэг төрийн бус байгууллагын төлөөллүүд хамтран ГХЯ, БНХАУ-ын Элчин сайдын яаманд шаардлага хүргүүлсэн байна. Тэдгээр иргэд Өвөрмонголын дунд сургуулиудын сургалтыг монгол бичгээр бус хятад хэл, бичгээр заах болсныг эсэргүүцэн цугласнаа илэрхийлсэн юм.

Тэд "Өвөрмонголчуудын тэмцэл үр дүнд хүрсэн гэдэг нь худал, бид хятад дахь Өвөрмонгол иргэдтэй байнгын холбоотой, мэдээлэл авч байгаа" гэлээ. 

Фото сурвалжилга

Гадаад харилцааны яам болон БНХАУ-ын Элчин сайдын яамны гаднах фото сурвалжилгыг хүргэж байна.