УИХ-ын ээлжит сонгуульд 15 нам, дөрвөн эвсэл өрсөлдөх нь тодорхой болоод буй. 

Харин бие даан нэр дэвшигчдийн тухайд мөрийн хөтөлбөрөө аудитын байгууллагад хянуулахаар хүргүүлэх хуулийн хугацаа энэ сарын 25-наар дуусгавар болсон. 

Зарим бие даагч нэр заан, өрсөлдөгчөө дуудаж, олон нийтэд хандан мэдээлэл хийв. Харин зарим нь хянуур хандаж, аль нэг улс төрийн хүчнийг төлөөлөлгүй бор зүрхээрээ сонгуульд оролцох гэж байгаагаа ихэд нууцалж байгаа бололтой. Ямартай ч энэ удаагийн парламентын сонгуульд өрсөлдөхөөр 200 орчим бие даагч мөрийн хөтөлбөрөө аудитын байгууллагад хүргүүлжээ. 

Бие даан нэр дэвшихээр горилж буй олны танил улс төр, урлаг, спортын салбарын эрхмүүдээс онцлон танилцуулж байна. 

Ерөнхий сайд асан Н.Алтанхуяг

Гэрэл зургийг mpa.mn

Тэрбээр Үндэсний аудит газарт мөрийн хөтөлбөрөө хүргүүлснийхээ дараа хэвлэлд ярилцлага өгөхдөө хэдийгээр бие даан нэр дэвших гэж байгаа ч цаашдаа АН-д буцаад ороход болохгүй зүйлгүй хэмээсэн юм. 

УИХ-ын гишүүн С.Жавхлан

Гэрэл зургийг mpa.mn

2016 оны УИХ-ын сонгуулийн дүнгээр цорын ганц бие даан нэр дэвшигч болж парламентад суусан эрхэм гишүүн энэ удаад ч мөн аль нэг намд харьяалагдахгүйгээр өрсөлдөхөөр болжээ. Тэрбээр хуулийн хугацаандаа амжиж мөрийн хөтөлбөрөө хянуулахаар аудитын байгууллагад хүргүүлсэн байна. 

НИТХ-ын тэргүүлэгч Э.Бат-Үүл

 

 Тэрбээр нийслэлд АН-ыг төлөөлж суугаа ч энэ удаад бие даан нэр дэвшихийг илүүд үзжээ. 

Хуульч Ж.Эрхэмбаатар

 

Нийтийн эрх ашгийг хамгаалах шаардлагатай асуудалд хуульчийн зүгээс байр сууриа илэрхийлсээр ирсэн Ж.Эрхэмбаатар бие даан нэр дэвшихээр мөрийн хөтөлбөр боловсруулан хуулийн дагуу аудитын байгууллагад хүргүүлжээ. 

АН-ын дэд дарга Б.Дэлгэрмаа 

Монгол Улсаас ОХУ-д суух онц бөгөөд бүрэн эрхт Элчин сайд Б.Дэлгэрмаа

Одоогоос жилийн өмнө хуралдсан Үндсэн бодлогын хорооны хурлаар намынхаа дэд даргаар сонгогдсон тэрбээр энэ удаад намаасаа бус бие даан нэр дэвшихээр болжээ. Намын зүгээс түүний энэхүү алхам залуустаа боломж олгож байгаа явдал хэмээн тайлбарласан. 

Ерөнхийлөгчийн зөвлөх Г.Уянга 

Гэрэл зургийг MPA.mn

Өмнөх парламентын үед Шударга ёс эвслээс өрх тусгаарлан Тусгаар тогтнол эв нэгдлийн намыг байгуулж байсан тэрбээр өдгөө Монгол Улсын Ерөнхийлөгчийн Иргэний нийгэм, хүний эрхийн бодлогын зөвлөхөөр ажиллаж буй. Тэрбээр 2020 оны УИХ-ын сонгуульд бие даан нэр дэвшихээр мөрийн хөтөлбөрөө аудитын байгууллагад хүргүүлжээ. 

Холимог тулааны тамирчин Ц.Амарбаясгалан 

 

Гэрэл зургийг Ц.Амарбаясгалан-Shinobu Amaraa пэйж хуудсаас авав

Холимог тулааны спортын тамирчин, муатай, кикбоксын дэлхийн аварга Ц.Амарбаясгалан спортын салбарынхны төлөөлөл болон энэ удаагийн сонгуульд бие даан нэр дэвшихээр болжээ. 

Бие даагчаар мөрийн хөтөлбөрөө боловсруулсан ч аль нэг намд элсэх эрх нээлттэй 

Дээрх эрхмүүдээс гадна эрх баригч намын УИХ-д сууж буй гишүүд ч бие даан нэр дэвшихээр мөрийн хөтөлбөр боловсруулан Үндэсний аудит газарт хүргүүлсэн гэх мэдээлэл бий. Гэхдээ бие даагчийн мөрийн хөтөлбөр боловсруулан аудитын байгууллагад хянуулахаар хүргүүлсэн ч нам, эвслүүд нэр дэвшигчээ тодруулахаас өмнө аль нэг намд гишүүнээр элсэх эрх нь нээлттэй байх юм. 

Чухам хэн, ямар мөрийн хөтөлбөр боловсруулсан нь санал авахаас 22 хоногийн өмнө нийтэд ил болно.