"Цагдаагийн алба хаагчид галт зэвсэг хүлээлцэх үедээ сум алдаж, нэг алба хаагч нас барсан харамсалтай явдал болсон"
Сүхбаатар аймагт галт зэвсгийн улмаас шархдаж, амиа алдсан цагдаагийн алба хаагчийн хэрэгтэй холбогдуулан ЦЕГ-ын Мэдээлэл, дүн шинжилгээ, Шуурхай удирдлагын албаны дарга, цагдаагийн хурандаа О.Зоригт тайлбар хийлээ.
Тэрбээр “Цагдаагийн алба хаагч амиа алдсан харамсалтай хэрэг болсон. Уг хэрэг цагдаагийн алба хаагчид хоорондоо маргалдсан буюу ямар нэгэн санаатай үйлдэл байгаагүй.
тодруулбал, Хоёрдугаар сарын 22-ны өглөө Сүхбаатар аймаг дахь Цагдаагийн газрын жижүүрийн Шуурхай удирдлагын тасгийн алба хаагчид ажлаа хүлээлцэхдээ буюу галт зэвсэг хүлээлцэж байх үедээ сум алдаж нэг албан хаагч маань шархадсан. Дахин тэмдэглэж хэлье. Энэ бол цэвэр болгоомжгүй, санамсаргүй үйлдэл болсонтой холбоотой.
Бид алба хаагчийнхаа амь насыг аврахын тулд нисдэг тэргээр авч ирж, Цэргийн төв эмнэлэгт хэвтүүлэн ес хоногийн турш боломжит бүх эмчилгээг хийлгэж, арга хэмжээ авсан боловч гуравдугаар сарын 2-ны өдөр нас барсан харамсалтай үйл явдал боллоо.
Уг асуудалтай холбогдуулан хуулийн дагуу АТГ шалгалт явуулж байгаа. ЦЕГ-аас албаны шалгалт мөн явуулсан.
Үйл явдал болсон жижүүрийн өрөө камерын хяналттай учраас бүх үйл явц бичлэгт хадгалагдаж үлдсэн. Албаны шалгалтын дүнд буруутай алба хаагч, албан тушаалтнуудад хариуцлага тооцох нь тодорхой юм” гэв.
