ФОТО: Улсын хил маналцаж буй ноход

Т.Саран, iKon.mn

2020 оны 1 сарын 9

iKon.MN

00:00 00:00

ФОТО: Улсын хил маналцаж буй ноход

Sara, ikon.mn - text to speech

Хуулийн дагуу хилийн анги, тусгай салбаруудад хилийн эрлийн нохойг улсын хил хамгаалалтад ашиглаж байгаа тухай Хил хамгаалах ерөнхий газраас мэдээллээ.

Хилийн эрлийн нохдыг сургах нь хамгийн чухал байдаг байна. Энэ хүрээнд тус газраас хийсэн ажлуудаа танилцуулсан юм.

Тухайлбал, Хилийн 0151 дүгээр ангийн “Албаны нохойн сургалтын төв”-ийн үржлийн нохойн байрыг шинээр барьж, сургалтын хотхоныг зааврын дагуу төхөөрөмжлөн, материаллаг баазыг бэхжүүлжээ.

Xилийн эрлийн нохойн анхан шатны сургалтыг 2017-2019 онуудад 45-60 хоногийн хугацаатай зохион байгуулж, албаны нохой сургагч, хөтлөгчийг нохойн хамт сургаж бэлтгэсэн байна. Цаашид цэвэр үүлдрийн үржлийн нохойг худалдан авч хилийн ангиудыг албаны нохойгоор бүрэн хангахаар төлөвлөжээ.

Хилийн 0243, 0101, 0151 дүгээр анги, ОХУ-ын ХАБА-ны Буриадын ХУГ-тай хамтран “Улсын хил хамгаалалтад албаны амьтад ашиглах нь” сэдэвт туршлага солилцох уулзалтыг Сэлэнгэ аймгийн Сүхбаатар хотод зохион байгуулсан байна.

Мөн хилийн ангиудын хариуцсан хэсэгт цас их орж, зам, даваа хаагдан, тээврийн хэрэгсэл явахад хүндрэлтэй болсон, алслагдсан хэсгийн хил хамгаалалтыг зохион байгуулах, хангалт хүргэх, эмнэлгийн анхан шатны тусламж үйлчилгээ үзүүлэх зорилгоор нохой чаргыг ашиглаж эхэлжээ.

Улсын хил хамгаалалтад нохой чарга ашиглах анхны сургалтыг “Тэрэлж жаргал” ХХК-тай хамтран зохион байгуулсан бол нохой чаргыг улсын хил хамгаалалтад ашиглах арга зүйн сургалтыг 2018-2019 онд гурван удаа зохион байгуулсан тухай мэдээлэв.

Түүнчлэн хилийн 0252 дугаар ангийн Үйлдвэрлэл, технологийн цехэд чарга болон дагалдах тоног хэрэгслийг хийлгэж, зарим хилийн ангийг чаргатай болгосон байна.

Цаашид албаны нохойн ашиглалт, эзэмшилт, хамгаалалтыг сайжруулах зорилгоор “Албаны нохой 2020-2024” хөтөлбөрийг боловсруулан, хэрэгжүүлэх зорилт тавьжээ.

Монгол Улсын хил

Монгол Улсын нутаг дэвсгэрийн хязгаарыг газрын гадаргуу, усны мандал дээр хил залгаа улсын нутаг дэвсгэрийн хязгаараас зааглаж, Монгол Улсын олон улсын гэрээгээр тодорхойлж, тогтоосон шугамыг Монгол Улсын "хил" гэнэ. Уг шугамаас эгц дээш агаарын, мөн шугамаас эгц доош газрын хэвлийн хил байна. Улсын хил халдашгүй дархан байна гэж тодорхойлсон. Агаар мандалын дээд хязгаарыг газрын хөрснөөс дээш 60-150 км гэж үздэг. Газрын хэвлий нь түүний өнгөн хөрсний мандал буюу халуун лав, цааш нь цөм буюу төв хүртэл үргэлжилнэ. Монгол Улс Бүгд Найрамдах Хятад Ард Улстай 1962 онд "БНМАУ ба БНХАУ-ын Хилийн гэрээ"-г байгуулж өмнөд хилээ албан ёсоор баталгаажуулсан, 1962-1964 онд улсын хилийг газар дээр нь тогтоон тэмдэглэсэн. Энэхүү Хилийн гэрээг 1975 онд Нэгдсэн Үндэстний байгуулагад албан ёсоор бүртгүүлсэн. Монгол Улс ОХУ-тай 1958 болон 1976 оны БНМАУ-ЗХУ-ын хоорондын Хилийн гэрээг байгуулж хойд хилээ баталгаажуулжээ.

ХИЛИЙН ДӨРВӨН ЗАХЫН ЦЭГ

Баруун захын цэг - Баян Өлгий аймгийн нутагт Монгол Алтайн нурууны 3252.0 тоот өндөрлөгөөс 3371.0 тоот өндөрлөг хүрэх хэсгийн ус хагалбарын шугам баруун тийш цүлхийсэн хэсэг дээр
Хойд захын цэг - Хөвсгөл аймгийн нутагт Монгол Шарын давааны 2091.6 тоот өндөрлөг
Зүүн захын цэг - Дорнод аймгийн нутагт Модтой хамар уулын зүүн талд уулын хажуугийн 1305 тоот өндөрлөгөөс баруун өмнө зүгт 190.0 метр зайд 1292.5 тоот өндөрлөг
Өмнөд захын цэг - Өмнөговь аймгийн нутагт Орвог Гашууны Бор толгойн 799.9 тоот өндөрлөг дээр тус тус байрладаг.

ФОТО: Улсын хил маналцаж буй ноход

Монгол Улсын хил

ХИЛИЙН ДӨРВӨН ЗАХЫН ЦЭГ

Фото