ВИДЕО, ФОТО: 2019 оны онцлох АГШНУУД

Монгол Улсад 2019 онд болж өрнөсөн үйл явдлууд гэрэл зурганаа хэрхэн түүх болж буусныг MPA.mn-ий цомгоор тоймлон хүргэж байна. 

Улирч буй жилд улс орны эдийн засагт ихээхэн чухал, олон жил яриад хийж чадаагүй бүтээн байгуулалтууд шил шилээ даран гараанаас гарсан бол саар бараан явдлууд ч нийгмийг тойрсонгүй. Монгол тамирчид багийн төрөлд анх удаа олимпод орох эрхээ авч, монголын баялаг бүтээгчид олон улсын өрсөлдөхүйц бүтээгдэхүүн үйлдвэрлэж, цэргүүд, дотоодын ажиллах хүчний оролцоотойгоор төмөр зам тавьж, нефтийн үйлдвэртэй болохоор эрвийх дэрвийхээрээ зүтгэж байх зуур иргэдийнхээ боломжийг хулгайлсан эрх баригчдын хэрэг тусгай сангаас сангийн хооронд дамжин хөвөрсөөр. Олон ч хүнийг барьж, саатуулж, шалгаж, сулласан жил байлаа. Энэ зуур Байгалийн түүхийн музейгээ ч нураагаад авав. 

ВИДЕО:

Цагдаа, тагнуул гээд хүчний байгууллагууд махны үйлдвэрүүдээс эхлээд мөнгөний орд, зочид буудлуудад тусгай ажиллагаа явуулж, гадаад, дотоодын цахим болон хар тамхины хэрэгтнүүдийг мах бэлтгэгчидтэй "илрүүлсэн".

Б.Лхагвасүрэн, Б.Шарав гээд ард олон, төрдөө хүндлэгдсэн хосгүй алдартнуудаа зуурдаар алдсан бол төр, нийгмийн зүтгэлтнээ төрийн ордонд цаг бусаар алдсан хэрэг ч гарсан юм. 

Ардчилсан хөдөлгөөн үүсэн байгуулагдсаны 30 жилийн ойгоор улс төр, ялангуяа шүүх засаглалд нэлээд шуургатай жил байсан гэж болно. 

Харин гурван парламент дамжин хэлэлцэгдэж ирсэн Үндсэн хуулийн нэмэлт өөрчлөлтийг энэ онд өөрчилсөн нь яах аргагүй түүхэн үйл явдал байлаа. Хэдий төгс болоогүй ч тодорхой ахиц авчирч чадна гэдэгт итгэлтэй байгаагаа хуульчид, мэргэжлийн хүмүүс хэлж буй. Олон улсад ч Монгол Улсын бодлого амжилттай явж, ОХУ болон гуравдагч хөрш АНУ-тай стратегийн түншлэл байгуулсан нь мөн түүхэнд явдал байлаа.

Фото