ФОТО: "НҮБ-ын төгөл"-д шинээр 200 мод тарилаа

Жил бүрийн аравдугаар сарын 24-нийг Нэгдсэн Үндэсний Байгууллагын өдөр болгон тэмдэглэдэг уламжлалтай.

Уг өдрийг угтаж Монгол дахь НҮБ-ын харьяа агентлагуудын ажилтнууд Үндэсний цэцэрлэгт хүрээлэн дэх "НҮБ-ын төгөл"-д шинээр 200 мод тарилаа. Өнөөдөр шинээр тарьж буй нарс, хайлаас модны үрсэлгээг Булган аймгийн Хангал сумын Хялганат тосгоноос буюу БОАЖЯ, НҮБ-ын ХХААБ-аас хэрэгжүүлж буй “Ой бүхий аймгуудын биологийн олон янз байдлын хамгаалал, ойн тогтвортой менежмент, нүүрстөрөгчийн хуримтлалыг нэмэгдүүлэх нь” төсөлтэй хамтран ажилладаг ойн ангиудаас авчирчээ.

Энэ үеэр НҮБ-ын Суурин зохицуулагч Тапан Мишра "Ирээдүй хойч үедээ ногоон байгууламжийг үлдээхээр хүчин чармайлт гаргаж байгаа бидний өнөөдрийн арга хэмжээнд хүүхэд, залуучууд оролцож байгаад баяртай байна.

НҮБ-ын бүх агентлаг хамтраад эрүүл орчин, аюулгүй хүнсний байдлыг бий болгохын төлөө нэгдэн ажиллаж байгаа. Тогтвортой хөгжлийн төлөө олон улсын байгууллагууд, Засгийн газартай хамтарч ажилладаг. Нэг зорилгын төлөө тал бүр тууштай ажиллах нь чухал" хэмээж байв.

2012 онд Үндэсний цэцэрлэгт хүрээлэнд "НҮБ-ын төгөл"-ийг байгуулсан бөгөөд энэ жил мод нэмж тарих санаачилгыг НҮБ-ын Суурин зохицуулагч  гаргасан байна. Түүний санаачилгыг ГХ-ны сайд Д.Цогтбаатар, ХХААХҮ-ийн сайд Ч.Улаан, БОАЖ-ын сайд Н.Цэрэнбат нар дэмжиж мөн мод тарих арга хэмжээнд оролцсон юм.

ФОТО

Гэрэл зургийг mpa.mn