Шинэ нисэх буудал нь Улаанбаатараас 50 километрийн зайтай, Төв аймгийн Сэргэлэн сумын нутаг дэвсгэрт Хөшигийн хөндий гэх газар баригдаж байгаа билээ.
Хөшигийн хөндийн нисэх буудлыг Улаанбаатартай холбосон хурдны замыг өнөөдөр нээлээ. Уг зам нь 32.2 километр урттай, замын зорчих хэсгийн өргөн нь 32.5 метр, хоёр урсгал 6 эгнээтэй. Зорчих хэсэг тус бүр нь зааглагдсан байна.
Нээлтийн үеэр Зам, тээвэр хөгжлийн сайд Б.Энх-Амгалан "Монгол Улс анхны хурдны замаа хүлээж авч байна. Энэ зам тууш зам. Эрхзүйн хэллэгт 1996 онд "тууш зам" гэж орсон байдаг. Иргэдэд хэлэхэд хурдалдаг зам гэж ойлгож болохгүй. 100км/цагийн хурдтай явна.
Автобусны зогсоол байхгүй. Эргэх, тойрох орц, гарцгүй. Аваарын 10 гарц, зургаан гүүр, үер усны 49 хоолойтой. Гялбаанаас хамгаалсан хаалттай. Хурд хэмжигч болон камерууд суурилуулсан олон улсын стандартад нийцсэн зам юм.
Цаашдаа Монгол Улсад ийм зам олноор баригдана гэж найдаж байна" гэлээ.
Хурдны замын ажлын нийт өртөг нь 140.3 сая ам.доллар бөгөөд барилгын ажлыг 3 жилийн хугацаанд гүйцэтгэж 2019 оны долоодугаар сарын 3-ны өдөр улсын комисст хүлээлгэж өгчээ.
Нээлтээс хийсэн фото сурвалжилгыг хүргэж байна.